7
Yave nwanina munu
1 Mukunga ya kyadi ya Davidi yina yandi yimbilaka Yave samu na Kuse, mu-Bezame.
2 Yave, Nzambi ya munu, nge kele kiswamunu ya munu.
Vuukisa munu mpe kuula munu na maboko ya bayina ke na kukwamisa munu.
3 Kana ve, bawu ke pasula munu mutindu nkosi ke salaka.
Bawu ke sasa munu mpe ata muntu ke kwiza kuula munu.
4 Yave, Nzambi ya munu, kana mu me sala yina ba ke na kutuba,
kana maboko ya munu me sala dyambu ya yimbi,
5 kana mu salaka yimbi na muntu yina vwandaka na kizunu na munu,
kana mu lakisaka ve bumbote ya munu na muntu yina vwandaka yina munu kondwa dyambu,
6 bika ti mbeni kulanda munu mpe yandi kuzwa munu.
Bika ti yandi kubwisa luzingu ya munu na ntoto,
yandi kudyata yawu, yandi kusafula buzitu ya munu na mfundu-mfundu!
Kupema
7 Yave telama na nkele ya nge!
Sukisa kudasuka ya bambeni ya munu!
Nge yina ke salaka lufundusu ya mbote,
vumbuka samu na kunwanina munu,
nge yina ke twadisaka lufundusu.
8 Bika ti mukangu ya bantu nyonso kuzunga nge!
Kwiza vwanda na kyandu ya nge samu na kuyala bawu!
9 Nge Yave, fundisa makanda ya bantu,
Yave nwanina munu mutindu kele kusungama mpe kudedama ya munu!
10 Mulemvo ya nge, sukisa yimbi yina bantu ya yimbi ke na kusala!
Nge Nzambi ya kudedama, syamisa muntu ya kudedama!
Nge yina ke fyongoninaka ntima mpe mansweki ya muntu!
11 Nzambi kele kinwanunu ya munu yina ke kebaka nzutu.
Yandi ke vuukisaka bayina kele na ntima ya kusungama!
12 Nzambi kele zuzi ya kudedama,
ntangu nyonso, yandi ke lakisa nkele ya yandi.
13 Kana muntu ya yimbi kusoba ve ntima ya yandi,
Nzambi ke lengula mbele ya yandi ya mvita,
yandi ke kubika munani ya yandi mpe yandi ke kubula.
14 Ni samu na yandi Nzambi ke na kubika binwanunu ya yandi yina ke kufwaka.
Ni samu na yandi Nzambi ke na kubika madyonga ya yandi yina ke lemaka tiya.
15 Mutindu kento yina kele na kivumu,
muntu ya yimbi ke kubikaka mambu ya yimbi,
yandi ke na kunata mpasi,
yandi ke na kubuta luvunu.
16 Yandi me timuna dibulu ya yinda,
kasi yandi ke kubwa na mutambu ya yandi mosi.
17 Mpasi yina yandi kubikaka na kusala me bwidila yandi na yintu.
Yimbi yina yandi zolaka sala me bwidila yandi na mbunzu.
18 Mu ke kembila Yave samu na kudedama ya yandi.
Mu ke yimbila Nkumbu ya Yave Nzambi ya Kulutila Kuzangama.