ba ke yimbilaka yawu na muningu ya nsambi ya Ngate.

Mukunga ya Davidi.

2 Yave, Mfumu ya beto,

Nkumbu ya nge kele ya ngitukulu na ntoto nyonso!

Kitoko ya nge me lutila kitoko ya mazulu.

3 Ni na yinwa ya bana ya fyoti, ya bana yina ke ntete na kunwa mabene,

nge ke lakisaka lulendo ya nge na bambeni ya nge.

Ni mutindu yina nge ke salaka,

na kukangisa yinwa ya mitantu ya nge,

yina ke bikaka ve na kunwanisa nge.

4 Ntangu mu ke talaka dizulu, kisalu ya maboko ya nge,

mpe ngonda na bambwetete yina nge tulaka na kisika ya yawu,

5 nani kele muntu samu ti nge bambukila yandi moyo?

Nani kele Mwana ya Muntu samu ti nge baka bunkete ya yandi?

6 Nge salaka ti yandi kuvwanda fyoti na yisi ya banzambi.

Nge fulusaka yandi na nkembo mpe buzitu.

7 Nge pesaka yandi lutumu ya kuyala nyonso yina nge yidikaka na maboko ya nge,

nge tulaka bima nyonso na yisi ya makulu ya yandi,

8 ya vwanda mameme na bankombo,

bangombe mpe bibulu nyonso ya mfinda,

9 bandeke ya mazulu na bambisi ya mubu,

mpe nyonso yina ke tambulaka na banzila ya mubu.

10 Yave, Mfumu ya beto,

Nkumbu ya nge kele ya ngitukulu na ntoto nyonso!