ba ke yimbilaka yawu na muningu ya «Mute-Labene.»

Mukunga ya Davidi.

2 Mu ke kembila Yave na ntima ya munu nyonso.

Mu ke zonzila mambu nyonso ya ngitukulu yina nge me sala.

3 Na nge mu ke yangalala, mu ke dumuka na kilengi.

Mu ke yimbila Nkumbu ya nge, nge Nzambi ya Kulutila Kuzangama.

4 Ntangu bambeni ya munu ke vutukaka manima,

bawu ke bulaka mabaku,

bawu ke kufwaka na ntadisi ya nge.

5 Ya tsyelika, nge me nwanina munu, nge me talisa ludedomo ya munu.

Nge kele zuzi ya kudedama, nge kele ya kuvwanda na kiti ya nge ya kintinu.

6 Nge ke kebisaka bantu ya bayinsi ya nkaka, nge ke kufwaka muntu ya yimbi,

nge ke zimbisaka bankumbu ya bawu bantangu nyonso, mpe ya mankululu.

7 Bambeni kele dyaka ve! Kaka mwangusulu ya mankululu.

Nge me mwangisa bambanza,

bantu ke na kubambuka dyaka moyo ve.

8 Kasi Yave ke yalaka ya mankululu,

yandi kele ya kuvwanda na kiti ya yandi ya kintinu samu na kufundisa.

9 Ni yandi ke fundisaka yinza na ludedomo,

yandi ke fundisaka makanda ya bantu na kusungama nyonso.

10 Bika ti Yave kuvwanda kiswamunu samu na muntu yina ba ke na kukwamisa.

Bika ti yandi kuvwanda mutindu kibaka ya lukengolo na bantangu ya mpasi.

11 Bika ti bantu kutula kivuvu ya bawu na nge,

bayina me zaba Nkumbu ya nge.

Samu ti nge ke bikaka ve bayina ke sosaka nge, Yave!

12 Beno yimbidila Yave, yandi yina ke zingaka na Siyone!

Beno samuna mambu ya ngitukulu yina yandi me sala!

Beno samuna yawu na kati ya makanda nyonso ya bantu!

13 Yandi ke futisaka bayina ke tangisaka menga ya bantu.

Yandi ke bambukaka moyo ya bayina ba me kufwa.

Yandi ke zimbanaka ve kulooka ya bantu ya mpasi.

14 Yave fwila munu kyadi, tala mpasi yina bambeni ke na kutalisa munu,

nge yina ke kuulaka munu na mwelo ya lufwa,

15 samu ti mu yimbila nge dyaka mikunga ya nzitusu,

na myelo ya Siyone, ndumba ya kitoko,

mpe ti mu yangalala samu na mpulusu ya nge.

16 Bantu ya bayinsi ya nkaka ke na kubwa na kati ya mabulu yina bawu mosi timunaka,

makulu ya bawu ke na kukangama na mitambu yina bawu mosi bumbaka.

17 Yave ke salaka ti bantu kuzaba yandi, yandi ke salaka na mutindu ya kufwanakana.

Muntu ya yimbi ke na kubwa na mutambu yina yandi mosi me sala na maboko ya yandi.

Muningu ya bisikulu.

18 Bika ti bantu ya yimbi kukwenda na yinsi ya bantu ya kufwa,

bayinsi nyonso yina me zimbana Nzambi.

19 Kasi Nzambi ke zimbanaka ve mputu bantangu nyonso.

Kivuvu ya bantu ya mpasi ke zimbana ve ya mankululu.

20 Yave, telama! Kubika ve ti muntu kununga!

Sala ti makanda ya bantu kufunduswa na mantwala ya nge!

21 Yave, sala ti bawu kuvwanda na boma ya kulutila!

Yave, sala ti makanda ya bantu kuzaba ti bawu kele kaka bantu!