1 Yave, samu na yinki nge kele ntama na munu?

Samu na yinki nge me bumbama ya nge na ntangu ya mpasi?

2 Na kati ya lunangu ya bawu, bantu ya yimbi ke na kunyokola bamputu,

bika ti bawu kukangama na mitambu yina bawu mosi me sala.

3 Muntu ya yimbi ke talaka kilengi na mambu yina yandi ke zolaka,

muntu yina ke botolaka bima ya ngana, yandi ke vwezaka mpe ke sekaka Yave.

4 Muntu ya yimbi na kati ya lunangu ya yandi ke tubaka mutindu yayi:

«Nzambi ke pesaka ve kitumbu! Nzambi kele ve!»

Yina ni mambu yina kele na kati ya ntima ya yandi.

5 Nyonso yina yandi ke salaka ke yilamaka ntangu nyonso,

bamfundusu ya nge me lutila kuzangama, yawu lenda bwidila yandi ve,

Yandi ke kombolaka bambeni ya yandi na mupepe.

6 Yandi ke na kutuba: «Mu lenda kubwa ve,

bambandu na bambandu, mpasi ke kumina munu ve!»

7 Yinwa ya yandi kele ya kufuluka na bansiingulu, na luvunu mpe na mambu ya yimbi.

Bikoba ya yandi ke basisaka kaka mambu yina ke kwamisaka mpe ke lwalisaka.

8 Yandi ke na kubumbama samu na kubasikila bantu na mpamukunu na babwala,

yandi ke na kufwa bantu yina me sala ata dyambu na bisika yina bawu kele ya kubumbama.

Meso ya yandi ke sosaka muntu ya mpasi.

9 Yandi ke na kubumbama samu na kubasikila bantu na mpamukunu,

mutindu nkosi na kati ya dibulu ya yandi.

Yandi ke na kubumbama samu na kubasikila mputu na mpamukunu.

Yandi ke na kubumbimina mputu samu na kubenda yandi na mutambu ya yandi.

10 Yandi ke na kukondama, yandi ke na kubetama.

Bamputu ke na kubwa na lutumu ya yandi.

11 Yandi ke tubaka mutindu yayi:

«Nzambi ke zimbanaka mambu!

Yandi ke bumbaka kizizi ya yandi,

yandi ke talaka yawu ve!»

12 Yave, telama!

Nzambi, lambula diboko ya nge!

Kuzimbana ve bantu ya mpasi!

13 Samu na yinki muntu ya yimbi ke na kuvweza Nzambi?

Samu na yinki yandi ke na kutuba: «Nzambi ke pesaka ve kitumbu?»

14 Kasi nge Nzambi, nge ke talaka bamfyetokoso mpe bampasi.

Nge ke nwaninaka muntu yina ke na mpasi.

Ni na maboko ya nge muntu ya kyadi ke kukipesaka.

Ni nge ke sadisaka mwana-nsaana.

15 Zenga diboko ya muntu ya yimbi,

futisa yandi yimbi ya yandi,

yandi kutalana dyaka ve na ntadisi ya nge.

16 Yave kele ntinu ya bantangu nyonso mpe ya mankululu.

Bantu ya bayinsi ya nkaka ke vwanda dyaka ve na yinsi ya Yave.

17 Yave, nge zaba bansatu ya bantu ya mpasi,

nge ke kindisaka bantima ya bawu.

Nge ke tekaka makutu na mambu ya bawu,

18 samu na kunwanina mwana-nsaana mpe muntu yina ba ke na kukwamisa.

Samu ti muntu yina nge yidikaka na ntoto bika na kutalisa bantu boma ya kulutila.