Yave tala ludedomo ya munu,

teka makutu samu na kuwa kuyawula ya munu!

Kuwa lusambulu ya munu,

yina ke na kubasika na yinwa yina ke vunaka ve!

2 Na ntumunu ya nge Yave, nwanina munu,

bika ti meso ya nge kutala yina kele ya kusungama!

3 Nge me zaba mbote ntima ya munu,

nge ke fyongoninaka yawu na mpimpa,

nge me meka munu,

nge me tala kima mosi ve,

mu ke na kuyindula,

mabanza na mambu yina ke na kubasika na yinwa ya munu

ke kaka mutindu mosi.

4 Mu me tuba ve yina mu ke na kubanza samu na bantu ya nkaka.

Mu me sala yina nge me lomba munu,

mu me landa ve banzila ya bantu ya yimbi.

5 Mu me kangama na kulanda kaka banzila ya nge,

mu me kubwa ve.

6 Mu ke na kubokila nge, samu ti nge Nzambi,

nge ke kuwaka lusambulu ya munu!

Teka dikutu ya nge na munu,

kuwa mambu ya munu!

7 Lakisa mambu yina nge ke salaka na kukwikama ya nge,

nge yina ke vuukisaka bayina ke kuzwaka

kiswamunu ya bawu na diboko ya nge ya lubakala,

ntangu bambeni ke talisaka bawu mpasi.

8 Bumba munu mutindu yingo ya disu,

keba munu na yisi ya mapapu ya nge.

9 Kuula munu na maboko ya bantu ya yimbi,

bayina ke na kubula munu,

mpe na maboko ya mitantu yina me zunga munu na nkele.

10 Bawu ke na bantima ya kukangama,

bawu ke zonzaka na lunangu nyonso.

11 Bawu ke na kulanda beto,

bawu me zungidila beto yimeni,

bawu ke na kusosa kaka na kulosa beto na ntoto,

12 mutindu nkosi yina kele na nsatu ya kupasula kibulu,

mutindu mwana ya nkosi yina me kubama

samu na kubwila kibulu na kati ya kiswamunu ya yandi.

13 Yave telama,

tedimina bambeni ya munu, vutula bawu manima!

Na mbele ya nge ya mvita, vuukisa munu na maboko ya bantu ya yimbi.

14 Na diboko ya nge, Yave vuukisa munu na maboko ya bantu, bantu ya yinza yayi.

Kikunku ya bawu kele na luzingu yayi.

Nge fulusaka bivumu ya bawu na bimvwama ya nge.

Bana ya bawu ya babakala yukutaka,

bawu bikaka bimvwama yina lutilaka na batekolo ya bawu.

15 Kasi munu, mutindu mu kele ya kudedama, mu ke tala kizizi ya nge,

ntangu mu ke vumbuka, mu ke yangalala na kutala kizizi ya nge.