2 Mazulu ke na kusamuna nkembo ya Nzambi.

Dizulu nyonso ya kuyalumuka ke na kulakisa bisalu ya maboko ya yandi.

3 Kilumbu ke samunaka yawu ntangu bwisi ke kutsyaka,

mpimpa ke lakisaka yawu ntangu bwisi ke yilaka.

4 Ya kele ve kaka mutindu ya kuzonza,

yawu kele ve bampova,

ba ke na kuwa ve bandinga ya bawu.

5 Bansangu ya bawu ke na kutambula na ntoto nyonso,

mambu ya bawu ke na kuwakana tii na bandilu ya yinza.

Kuna na zulu, Nzambi yidikaka yinzo ya lele samu na ntangu.

6 Yandi yayi ke na kubasika na kivinga ya yandi mutindu bakala yina me kwela.

Na kilengi nyonso, yandi ke na kutambula na nzila mutindu kinwani ya kibakala.

7 Yandi ke basikaka na ndilu mosi ya dizulu,

yandi ke kwendaka suka na ndilu ya nkaka.

Ata kima mosi ve lenda bumbama na mantwala ya tiya ya yandi.

8 Musiku ya Yave kele ya kulunga,

yawu ke bongisaka luzingu.

Kimbangi ya Yave kele ya tsyelika,

yawu ke pesaka ndwenga na muntu yina me kondwa luzabu.

9 Bansalulu ya misiku ya Yave kele ya kusungama,

yawu ke yangidikaka ntima.

Ntumunu ya Yave kele mpasi ve,

yawu ke kyenzolaka meso.

10 Kuzitisa Yave kele dyambu ya kuvedila,

yawu ke zingila bantangu nyonso.

Banzengolo ya Yave kele ya tsyelika,

nyonso kele ya kudedama.

11 Banzengolo ya Nzambi kele ntalu mingi kulutila wolo,

kulutila wolo ya mbote.

Yawu kele kitoko kulutila mafuta ya nyosi,

kulutila mafuta ya nyosi ya malu-malu.

12 Munu mosi kisyelo ya nge, yawu ke na kulwengisa munu.

Muntu yina ke bumbaka misiku ya nge, yandi ke kuzwa ndandu mingi.

13 Nani lenda zaba yimbi yina yandi me sala, yina yandi kanisaka ve na kusala?

Kusemba munu ve samu na mambu yina kele ya kubumbama samu na munu.

14 Keba munu na bantu ya lunangu!

Bawu kuyala ve na zulu ya munu!

Na yina mu ke vwanda ya kusungama,

dyambu mosi ve ya yimbi mingi ke talana na kati ya munu.

15 Bika ti mambu yina ke basika na yinwa ya munu,

mambu yina kele na kati ya ntima ya munu kuvwanda ya mbote na ntadisi ya nge.

Yave nge kele ditadi ya munu, kikuudi ya munu!