Yave, mu me baluka na sika ya nge.

2 Nzambi ya munu, mu me tula kivuvu ya munu na nge.

Kubika ve ti mu tala nsoni!

Kubika ve ti bambeni ya munu kununga munu!

3 Bayina nyonso ke tulaka kivuvu na nge ke talaka ve nsoni,

kasi bayina kele bambeni ya nge kondwa dyambu ke tala nsoni.

4 Yave, sala ti mu zaba ba nzila ya nge,

longisa munu mutindu nge zola mu zinga!

5 Twadisa munu na butsyelika ya nge mpe longisa munu!

Nge kele Nzambi ya mpulusu ya munu,

mu me tula kivuvu ya munu na nge bantangu nyonso.

6 Yave, bambuka moyo na kyadi mpe kukwikama ya nge,

yina ke zingilaka bantangu nyonso.

7 Kubambuka ve moyo na masumu ya buntwenya ya munu,

kubambuka ve moyo na kondwa kutumama ya munu!

Kasi bambukila munu moyo mutindu kele kukwikama ya nge,

samu na bumbote ya nge, Yave!

8 Yave kele mbote mpe yandi kele ya kusungama.

Ni yawu yina, yandi ke lakisa misumuki nzila.

9 Yandi ke twadisaka bamputu na ludedomo nyonso.

Yandi ke lakisaka bamputu nzila ya yandi.

10 Bandongosolo nyonso ya Yave kele ya mbote mpe ya tsyelika,

samu na bayina ke zitisaka ngwisani ya yandi mpe bantumunu ya yandi.

11 Yave, samu na Nkumbu ya nge,

nge ke lemvokila yimbi ya munu,

samu ti yawu kele nene.

12 Wapi muntu yina ke na buzitu na Yawe?

Yave ke lakisa yandi nzila yina yandi fwana soola.

13 Mwela ya yandi ke pema na buyenge,

bana ya yandi ke kuzwa ntoto.

14 Yave ke zabisaka mansweki ya yandi na bayina ke zitisaka yandi,

yandi ke salaka ti bawu kuzaba ngwisani ya yandi.

15 Ntangu nyonso, mu ke balulaka meso ya munu na Yave,

samu ti yandi ke katula makulu ya munu na mutambu.

16 Baluka na sika ya munu, fwila munu kyadi,

samu ti mu ke kaka munu mosi mpe na mpasi.

17 Bamfyetokoso me fulusa ntima ya munu,

Kuula munu na bampasi ya munu.

18 Tala nkwamusu mpe mpasi ya munu,

lemvokila masumu ya munu nyonso.

19 Tala mutindu bambeni ya munu kele mingi,

mpe ba ke na kuyina munu na nkele nyonso.

20 Bumba luzingu ya munu mpe kuula munu!

Mu kutala nsoni ve,

ni nge kele kiswamunu ya munu.

21 Kusungama mpe ludedomo kubumba munu,

ni na nge mu me tula kivuvu ya munu. 22 Oo Nzambi, kuula Isayeli!

Kuula yandi na bampasi ya yandi!