Yave, ni nge mu ke na kubokila.

Ditadi ya munu! Kukanga makutu ve na ndinga ya munu!

Kana nge vwanda ntama kondwa ku pesa munu mvutu,

mu ke kuma mutindu mosi,

na bayina ke na kukulumuka na ndyamu.

2 Kuwa lusambulu ntangu mu ke looka na nge,

ntangu mu ke nanguna maboko na kivinga ya kulutila longo ya Yinzo ya nge.

3 Kusemba munu ve kintwadi na bantu ya yimbi mpe na mivondi!

Ba ke zonzila kizunu na mpangi ya bawu,

kasi ba ke na mambu ya yimbi na ntima.

4 Semba bawu mutindu kele mavanga ya bawu!

Futisa bawu mutindu kele mavanga ya bawu ya yimbi!

Semba bawu mutindu kele mambu yina bawu me sala!

Vutula bawu mutindu kele mambu yina bawu me sala!

5 Ba ke na kusala keba ve na mambu yina Yave me sala,

mpe na bisalu ya yandi.

Yandi kubwisa bawu mpe kutelemisa bawu ve!

6 Nkembo na Yave!

Yandi me kuwa ndinga ya lusambulu ya munu.

7 Yave kele ngolo ya munu mpe kinwanunu yina ke kebaka nzutu ya munu.

Kivuvu ya munu kele na yandi, yandi me sadisa munu.

Ntima ya munu kele na nsayi,

mu ke kembila yandi na mikunga.

8 Yave kele ngolo ya bantu ya yandi,

yandi kele kibaka ya lukengolo samu na mpulusu ya Masiya ya yandi.

9 Vuukisa bantu ya nge mpe sakumuna mvwilu ya nge!

Vwanda Muvungi ya bawu mpe lusalusu ya bawu ya ntangu nyonso!