39
Na mantwala ya lufwa
1 Mukunga ya Davidi, mukunga yina ba twadisaka na mfumu ya miyimbidi, mukunga ya Yedutune.
2 Mu vwandaka tuba: «Mu ke sala keba na ndyatulu ya munu,
samu ti mu sumuka ve na mambu yina ke basika na yinwa ya munu.»
Mu ke kanga yinwa ya munu konso ntangu
yina muntu ya yimbi ke talana na mantwala ya munu.
3 Mu kumaka dibaba, mu vwandaka swii!
Mu kangaka yinwa, ata na yina me tadila mambu ya mbote!
Kasi mpasi ya munu vwandaka ya kulutila.
4 Ntima ya munu vwandaka kuya na kati ya munu,
mabanza ya munu vwandaka mutindu tiya ke na kulema,
mu tubaka mutindu yayi:
5 Yave, zabisa munu nsukunu ya munu,
lakisa munu lutangu ya bilumbu ya munu,
samu ti mu bakula ti mu ke kaka kima yina ke zingila ve.
6 Tala, nge me tula ndilu na luzingu ya munu,
yawu kele mutindu nene ya diboko.
Lutangu ya bilumbu ya munu ke kaka mutindu kima ya mpamba na mantwala ya nge.
Ya tsyelika, konso muntu ata ti yandi kele ya kutelama,
yandi ke kaka mupepe ya mpamba.
Kupema
7 Ya tsyelika, muntu ke tambulaka mutindu kinsinsya.
Yandi ke ninganaka, kasi ya ke kaka mupepe.
Yandi ke kuzwaka bimvwama,
kasi yandi ke zabaka ve nani ke bikana na yawu!
8 Na ntangu yayi Mfumu, yinki mu ke vingila dyaka?
Kivuvu ya munu kele na nge.
9 Kuula munu na masumu ya munu nyonso!
Kubika munu ve na bifingu ya bilawu!
10 Mu ke vwanda dibaba, mu ke fungula ve yinwa,
samu ti ni nge ke na ku sala.
11 Bika na kubula munu.
Mu me lemba samu ti nge ke na kubula munu ntangu nyonso.
12 Nge ke sembaka muntu na yimbi ya yandi,
samu na kusungika yandi.
Nge ke bebisaka bima ya yandi ya ntalu
mutindu banselele ke bebisaka bima.
Ya tsyelika, konso muntu ke kaka mupepe.
Kupema
13 Kuwa lusambu ya munu Yave!
Teka dikutu na kulooka ya munu,
kukanga ve makutu ya nge na bidilu ya munu!
Mu kele nzenza na sika ya nge,
mu kwizaka zinga kaka mwa ntangu mutindu bankooko ya munu!
14 Kutala munu ve,
bika ti mu pema tekila mu kwenda
mpe ti mu zimbana!