mukunga samu na kubambukaka moyo.

2 Yave! Kusemba munu ve ntangu yina nge me dasuka.

Kupesa munu ve kitumbu na nkele ya nge ya kulutila.

3 Madyonga ya nge me kuzwa munu!

Nge me bula munu na diboko ya nge!

4 Nzutu ya munu nyonso ke dyaka mbote ve, samu na nkele ya nge ya kulutila!

Mikwa ya munu me beba samu na yimbi ya munu.

5 Yimbi ya munu ke na zulu ya yintu ya munu,

yawu me lutila dema samu na munu mutindu kizitu ya dema.

6 Bamputa ya munu ke na kubasika nsunga mpe mafinya.

Samu na buzoba ya munu.

7 Mu kele dyaka na ngolo ve, mu me lemba mingi,

bilumbu nyonso mu ke na kwendaka tambula na kati ya kyadi.

8 Mu ke na kuya tiya na kati ya luketo,

Nzutu ya munu nyonso ke dyaka mbote ve!

9 Ngolo me manisa munu, mu me lemba munu nyonso.

Ntima ya munu ke na kuyawula, mu ke na kulooka.

10 Yave, nge zaba bansatu ya munu nyonso,

mpe nge ke na kuwa kuyawula ya munu.

11 Ntima ya munu ke na kubaba na mbangu, ngolo me manisa munu,

nsemo ya meso ya munu kele dyaka ve.

12 Bandiku ya munu, bankundi ya munu,

bawu ke na kukima bamputa ya munu.

Banfinangani ya munu me kuma ntama na munu.

13 Bayina ke na kusosa lufwa ya munu ke na kutula mitambu ya bawu.

Bayina ke na kusosa mpasi ya munu ke na kutonga munu.

Bawu ke na kubika ve na kuvunina munu mambu.

14 Mu ke na kuwa ve, mu kele mutindu muntu yina ke na makutu ya kufwa.

Mu ke na ndinga ve mu kele mutindu dibaba.

15 Mu kele mutindu muntu yina ke kuwaka ve,

yinwa ya yandi ke vutulaka ata mvutu ve.

16 Ya tsyelika, Yave nge kele kivuvu ya munu!

Mfumu ya munu, Nzambi ya munu, ni nge ke pesa munu mvutu!

17 Samu ti mu ke tubaka: «Kubika ve ti bawu kuyangalala samu na mpasi ya munu,

bawu kunwanisa munu ve ntangu mu kele ya kulemba.»

18 Mu ke dyaka ntama ve na kubwa,

mpe mpasi ya munu ke na kutatamana.

19 Ya tsyelika, mu me ndima yimbi ya munu,

mu ke na boma samu na disumu ya munu.

20 Bambeni ya munu ke na mavimpi ya mbote, mpe bawu ke na kibakala.

Bayina ke yinaka munu kondwa dyambu kele mingi.

21 Bawu ke na kuvutula munu yimbi na mambu ya mbote yina mu salaka,

bawu ke bambeni ya munu samu ti mu ke na kusosa mambu ya mbote.

22 Yave kubika munu ve!

Nzambi ya munu, kuvwanda ve ntama na munu!

23 Kwiza nswalu na kusadisa munu,

Yave, Muvuukisi ya munu!