Kudasukila ve bantu ya yimbi.

Kuvwanda ve na nsatu ya kuvwanda mutindu bantu yina ke sadilaka kondwa ludedomo.

2 Ya tsyelika, bawu ke yumaka na nswalu mutindu matiti,

bawu ke lembaka mutindu makasa ya maza.

3 Tula kivuvu ya nge na Yave mpe sadila mambu ya mbote.

Vwanda na kati ya yinsi mpe ti kukwikama kuvwanda mutindu madya ya nge.

4 Sala ti Yave kuvwanda kilengi ya nge,

yandi ke pesa nge yina ntima ya nge ke na yawu nsatu.

5 Pesa luzingu ya nge na Yave,

tula kivuvu ya nge na yandi, mpe yandi ke sala.

6 Yandi ke sala ti kudedama ya nge kutalana mutindu nsemo.

Yandi ke sala ti kusungama ya nge kutalana mutindu ntangu na ngunga ya midi.

7 Vwanda swi na ntadisi ya Yave mpe tula kivuvu ya nge na yandi.

Kudasukila ve muntu yina mambu ya yandi ke na kuyilama.

Kudasukila ve muntu yina ke lungisaka mambu ya yandi ya yimbi.

8 Bika kudasuka, losa nkele.

Dingama, kana ve ya lenda suka yimbi.

9 Samu ti bayina ke salaka yimbi ba ke katula bawu,

mpe bayina kele na kivuvu na Yave, bawu ke byadila yinsi.

10 Kaka mwa ntangu fyoti me bikana,

bantu ya yimbi ke vwanda dyaka ve!

Tala mbote kisika yina bawu vwandaka zinga,

ata muntu ke dyaka kuna ve!

11 Bamputu ke byadila yinsi,

Kizunu ya mingi ke sala kilengi ya bawu!

12 Muntu ya yimbi ke kubikaka mambu ya yimbi samu na muntu ya kudedama!

Yandi ke kwetisaka meno samu na yandi!

13 Kasi Yave ke na kuseka muntu ya yimbi,

samu ti Yave ke na kutala ti

kilumbu ya lufundusu ya muntu yina ke na kukwiza.

14 Bantu ya yimbi ke baka mbele ya bawu ya mvita,

bawu ke basisa minani ya bawu,

samu na kubwisa mputu mpe muntu ya mpasi,

samu na kufwa bayina ke landaka banzila ya kusungama.

15 Bambele ya bawu ya mvita ke kota na bantima ya bawu mosi,

mpe minani ya bawu ke zengana.

16 Mwa ndambu ya mvwilu ya muntu ya kudedama

me lutila bimvwama ya mingi-mingi ya bantu ya yimbi.

17 Ya tsyelika, lulendo ya bantu ya yimbi ke suka,

kasi Yave ke sadisaka bantu ya kudedama.

18 Yave zaba luzingu ya bantu ya kusungama,

mvwilu ya bawu ke zingilaka bantangu nyonso.

19 Bawu ke talaka ve nsoni na bantangu ya mpasi,

na bilumbu ya nsatu, bawu ke yukutaka.

20 Kasi bantu ya yimbi ke zimbana,

bambeni ya Yave, ata ti bawu kele mutindu bifulu ya kitoko ya mfinda,

bawu ke zimbana, bawu ke kwenda na mulinga.

21 Muntu ya yimbi ke defaka, mpe yandi ke vutulaka ve.

Muntu ya kudedama ke talaka bantu kyadi, mpe yandi ke kabulaka.

22 Bayina Yave me sakumuna,

ni bawu ke kuzwa yinsi mutindu mvwilu ya bawu.

Kasi bayina yandi me siinga,

bawu ke vwanda dyaka ve.

23 Ntangu luzingu ya muntu ke yangidikaka Yave,

Yave ke syamisaka ndyatulu ya yandi.

24 Kana yandi kubwa, yandi ke vwandila ve ya kubwa,

samu ti Yave ke telemisa yandi.

25 Mu vwandaka ntwenya, awa mu me nuna.

Mu me talaka ve ti Nzambi me bika muntu ya kudedama,

to bana ya yandi na kwendaka lomba dimpa.

26 Bilumbu nyonso, muntu ya kudedama ke talaka bantu kyadi,

yandi ke defisaka, mpe bana ya yandi ke kuzwa lusakumunu.

27 Kusala ve yimbi, sala mambu ya mbote,

nge ke zinga na yinsi bantangu nyonso.

28 Ya tsyelika, Yave ke zolaka ludedomo,

yandi ke bikaka ve bayina kele ya kukwikama na yandi.

Yandi ke kebaka bawu konso ntangu,

kasi bana ya bantu ya yimbi, bawu ke vwanda dyaka ve.

29 Bantu ya kudedama ke byadila yinsi,

bawu ke zinga kuna bantangu nyonso.

30 Yinwa ya muntu ya kudedama ke basisaka mambu ya ndwenga,

ludimi ya yandi ke samunaka mambu ya kusungama.

31 Musiku ya Nzambi ya yandi ke na ntima ya yandi,

na kutambula ya yandi, yandi ke kubwaka ve.

32 Muntu ya yimbi ke talaka na mansweki muntu ya kudedama,

mpe ke sosaka na kufwa yandi.

33 Kasi Yave ke yekulaka ve muntu ya kudedama na maboko ya muntu ya yimbi,

yandi ke nungisaka muntu ya kudedama na balufundusu.

34 Tula kivuvu ya nge na Yave, landa nzila ya yandi.

Yandi ke zangula nge samu ti yinsi kuvwanda ya nge.

Nge ke tala ti bantu ya yimbi, bawu ke vwanda dyaka ve.

35 Mu me tala muntu ya yimbi na lulendo ya yandi nyonso,

yandi ke na kulenda na mambu ya yandi,

mutindu yinti yina ke na makasa ya maza.

36 Yandi me luta, yandi ke dyaka ve.

Mu me sosa yandi, kasi yandi ke na kutalana ve.

37 Tala muntu ya kusungama, tala muntu ya kudedama,

ya tsyelika, muntu ya kizunu ni yandi ke vwanda na luzingu ya mbote.

38 Kasi bayina ke balukilaka Nzambi,

bawu nyonso ke vwanda dyaka ve,

bawu ke vwanda dyaka ve na kivuvu

ya kuzinga na bilumbu yina ke kwiza.

39 Mpulusu ya bantu ya kudedama ke katukaka na Yave,

yandi kele kibaka ya bawu ya lukengolo na ntangu ya mpasi.

40 Yave ke sadisaka bawu mpe ke kuulaka bawu.

Yandi ke kuulaka bawu na maboko ya bantu ya yimbi,

yandi ke vuukisaka bawu, samu ti bawu ke bumbamaka na sika ya yandi.