2 Na kati ya ntima ya munu,

mu ke na kubambuka moyo na dyambu ya muntu ya yimbi.

Na kati ya masumu ya yandi, yandi ke tubaka:

«Mu ke na kutala ve samu na yinki mu fwana kuvwanda na boma ya Nzambi.»

3 Yandi ke talaka ti yandi kele ya kulunga.

Yawu ke salaka ti yandi kundima ve yimbi ya yandi

mpe ti yandi kuyina yawu.

4 Mambu yina ke basikaka na yinwa ya yandi

kele ya luvunu mpe ya yimbi.

Yandi ke mangaka ndwenga mpe mambu ya mbote.

5 Ntangu yandi ke vwandaka na mfulu, na ntangu ya kulala,

ni kuna yandi ke kubikaka mambu ya yimbi.

Yandi ke tatamanaka na kulanda nzila ya yimbi,

yandi ke mangaka ve yimbi.

6 Yave, bumbote ya nge kele ya kuzanguka tii na mazulu,

kukwikama ya nge ke kumaka tii na matuti.

7 Ludedomo ya nge kele ya kuzanguka mutindu myongo ya Nzambi.

Banzengolo ya nge kele ya kusunda mutindu mubu.

Yave, nge ke vuukisaka bantu mpe bibulu.

8 Nzambi, bumbote ya nge nkele mfunu mingi!

Bantu ke kuzwaka kiswamunu ya bawu

na yisi ya mpewo ya mapapu ya nge.

9 Bawu ke kudyaka mpe ke yukutaka madya ya Yinzo ya nge.

Nge ke nwikisaka bawu maza ya nzadi ya bumbote ya nge.

10 Ya tsyelika, mukelo ya luzingu kele na sika ya nge!

Na nsemo ya nge, beto ke talaka nsemo!

11 Bumba bumbote ya nge na bayina zaba nge!

Mpe ludedomo ya nge na bayina ke na bantima ya kusungama!

12 Kubika ve ti muntu ya lunangu

kutula dikulu ya yandi na sika ya munu.

Kubika ve ti maboko ya bantu ya yimbi kubasisa munu na ngaanda.

13 Bayina ke salaka yimbi, bawu ke na kubwa.

Bawu me kubwa, ba lenda kutelama dyaka ve.