Yave! Vwanda mbeni ya bambeni ya munu!

Nwanisa bayina ke na nwanisaka munu!

2 Simba kinwanunu ya fyoti mpe ya nene yina ke kebaka ntulu,

mpe telama samu na kusadisa munu!

3 Nanguna dyonga mpe disoka samu na bayina ke na kulandaka munu!

Tuba na ntima ya munu: «Mpulusu ya nge, ni munu!»

4 Bayina ke na kusosa lufwa ya munu,

bika ti bawu kutala nsoni, bawu kusafuka!

Bika ti bayina ke na kusosa kusala munu yimbi,

bawu kuvutuka manima na nsoni!

5 Bika ti bawu kuvwanda mutindu bampusu ya bambuma yina mupepe ke na kunata.

Bika ti mbazi ya Yave kubingisa bawu!

6 Bika ti mbazi ya Yave kubingisa bawu!

Bika ti nzila ya bawu kuvwanda kitombe,

mpe ti bawu kusyelumuka!

Bika ti mbazi ya Yave kulanda bawu.

7 Samu ti kondwa dyambu,

bawu me bumbila munu mutambu na dibulu.

Kondwa dyambu, bawu me timuna dibulu samu na kufwa munu!

8 Bika ti mpasi ya nene kubwidila bawu na mpamukunu!

Bika ti bawu mosi kubwa na mutambu yina bawu me tambila munu!

Bika ti bawu kubwa kuna na mpamukunu.

9 Mu ke yangalala mingi na Yave!

Mu ke vwanda na nsayi samu na mpulusu ya yandi.

10 Mikwa ya nzutu ya munu nyonso ke tuba:

«Yave, nani kele mutindu nge?

Nani lenda kuula muntu na mpasi,

na maboko ya muntu yina me lutila yandi ngolo?

Nani lenda kuula muntu ya mpasi mpe mputu,

na maboko ya muntu yina ke na kutalisa bawu mpasi?»

11 Bambangi ya luvunu me telama,

bawu ke na kuyufula munu na mambu yina mu me zaba ve.

12 Bawu ke na kuvutula munu yimbi na mbote yina mu me sala.

Mu me bikana kaka munu mosi.

13 Kasi munu, ntangu bawu vwandaka na bimbevo,

mu vwandaka lwata binkuti ya bufwidi,

mu vwandaka kudya ve, mu vwandaka mina-nsoki,

kusambila samu na bawu ntangu nyonso.

14 Mu vwandaka sala na bawu

mutindu ba ke salaka na ndiku to na mpangi,

mu vwandaka kwenda yima-yima.

Mu vwandaka na kyadi,

mutindu muntu me fwila mama.

15 Ntangu mu ke kubwaka,

bawu ke vukanaka na kuyangalala samu na mpasi ya munu.

Bawu ke vukanaka na mansweki samu na kutonga munu.

Bawu ke na kubika ve na kukwamisa munu.

16 Kintwadi na bantu ya masumu,

na bayina ke sekaka bantu,

bawu ke na kukwetisa meno samu na munu.

17 Yave, wapi mutindu nge ke vibidila na kutalaka dyambu yayi?

Keba munu na yimbi yina ba zola kusala munu.

Keba luzingu ya munu na bana ya bankosi.

18 Mu ke kembila nge na kati ya mukangu ya nene ya bantu.

Mu ke siika nge na kati ya nkonga ya bantu ya ngolo.

19 Bika ti bayina ke na kunwanisa munu kondwa dyambu,

bambeni ya munu, bawu kuseka munu ve.

Bika ti bayina ke yinaka munu,

bawu kutala munu ve na disu ya yimbi.

20 Ya tsyelika, nzonzolo ya bawu kele ve nzonzolo ya kizunu.

Bawu ke butaka mambu ya luvunu na bantu yina ke zingaka na kizunu na yinsi.

21 Bawu ke na kufungula bayinwa ya bawu,

samu na kuzonza yimbi samu na munu,

bawu ke na kutuba: «Aa! Aa! Meso ya beto me tala!»

22 Yave, nge ke na kutala nyonso, kudingama ve!

Yave! Kuvwanda ve ntama na munu.

23 Yave, vumbuka, telama nge tala dyambu ya munu!

Nzambi ya munu, Mfumu ya munu, nwanina munu!

24 Yave Nzambi ya munu, nge yina kele ya kudedama, nwanina munu.

Kubika ve ti bambeni ya munu kuyangalala, samu na dyambu ya munu!

25 Bawu kutuba ve na ba ntima ya bawu:

«Aa! Yina beto vwandaka sosa yawu yayi!»

Bawu kutuba ve ti: «Beto me mina yandi yimeni!»

26 Bayina ke na kuyangalala samu na mpasi ya munu,

bika ti bawu nyonso kintwadi,

bawu kutala nsoni, bawu kusafuka.

Bayina ke na kunwanisa munu,

bika ti bawu kufuluka na nsoni, nsoni ya kulutila!

27 Bayina vwandaka ndima ti mu kele ya kudedama,

bika ti bawu kusala milolo ya nsayi, bawu kuyangalala.

Bika ti bawu kutuba konso ntangu:

«Yave kele Nzambi ya nene,

yandi ke zolaka ti kisyelo ya yandi kuvwanda na kizunu.»

28 Na yina, yinwa ya munu ke kembila ludedomo ya nge,

mu ke siika nge bilumbu nyonso.