34
Yave me kuula munu
1 Mukunga ya Davidi. Yayi ni mukunga yina Davidi yimbilaka ntangu yandi vunaka bulawu na mantwala ya ntinu Abimeleke. Ntinu bingisaka yandi mpe Davidi kwendaka.
2 Mu ke tonda Yave bantangu nyonso.
Yinwa ya munu ke bika ve na kukembilaka yandi.
3 Mwela ya munu ke yangalalaka na kati ya Yave!
Bamputu ke kuwaka yawu, bawu mpe ke yangalalaka!
4 Beno tuba na munu bunene ya Yave,
beto kembileno kintwadi Nkumbu ya yandi!
5 Mu me sosa Yave, yandi me pesa munu mvutu.
Yandi me kuula munu na mambu nyonso ya nsisi.
6 Bayina ke talaka na sika ya yandi,
bawu ke lezimaka na nsayi,
bizizi ya bawu ke fulukaka ve na nsoni.
7 Ntangu mputu ke lookaka,
Yave ke kuwaka yandi,
yandi ke katulaka mputu na kati ya bampasi ya yandi nyonso.
8 Mbazi ya Yave ke zungaka bayina ke zitisaka Yave.
Yandi ke salaka kivwandu ya yandi kuna.
Yandi ke kuulaka bawu.
9 Beno meka mpe beno tala wapi mutindu Yave kele mbote!
Kyese na muntu yina Yave kele kiswamunu ya yandi!
10 Beno zitisa Yave, beno yina kele bantu ya yandi ya longo!
Ya tsyelika, bayina ke zitisaka yandi ke kondwaka kima ve!
11 Bana ya nkosi lenda tala mpasi mpe kufwa nsatu,
kasi bayina ke sosaka Yave ke kondwaka ata kima mosi ve.
12 Beno bana ya munu, beno kwiza, beno kuwa munu!
Mu ke longisa beno na kuzitisa Yave.
13 Nani ke zolaka luzingu?
Nani ke zolaka bilumbu ya yinda samu na kuvwanda na buyenge?
14 Bika ti yandi sala keba na kubasisa mambu ya yimbi na yinwa ya yandi.
Bika ti bikoba ya yandi kubasisa ve mambu ya luvunu.
15 Bika na kusala yimbi, kasi sala yina kele ya mbote.
Sosa kizunu mpe landa yawu.
16 Meso ya Yave
kele ya kusikika na bantu ya kudedama,
mpe makutu ya yandi kele ya kukubama
na kuwa balusambulu ya bawu.
17 Kasi Yave ke zolaka ve bayina ke salaka yimbi,
samu na kukatula bankumbu ya bawu na ntoto1Py 3.10-12.
18 Ntangu bantu ya kudedama ke lookaka,
Yave ke kuwaka bawu.
Yandi ke katulaka bawu na kati ya bampasi nyonso ya bawu.
19 Yave kele pene-pene ya bayina ke na manyongo na ntima.
Yandi ke vuukisa bantu yina mpeve kele ya kulemba.
20 Bampasi ke bwidilaka mingi muntu ya kudedama,
kasi konso ntangu, Yave ke kuulaka yandi.
21 Yave ke kebaka mikwa nyonso ya nzutu ya yandi,
ata mosi ve ke zenganaka.
22 Bampasi ke kufwaka muntu ya yimbi.
Bambeni ya muntu ya kudedama ke kuzwaka kitumbu.
23 Yave ke kuulaka luzingu ya bisyelo ya yandi.
Bayina nyonso ke bumbamaka na kati ya yandi ke kuzwaka ve kitumbu.