1 Beno, bantu ya kusungama, beno sala milolo ya nsayi samu na Yave!

Nzitusu me bonga samu na bantu ya kudedama.

2 Beno kembila Yave na muningu ya nsambi.

Beno kembila yandi na nsambi ya basinga kumi.

3 Beno yimbila yandi mukunga ya malu-malu!

Beno sika mbote bisikulu ya beno na kusala milolo ya nsayi.

4 Ya tsyelika, mambu ya Yave kele ya kusungama.

Nyonso yina yandi ke salaka, ke salamaka na dede nyonso.

5 Yandi ke zolaka ludedomo mpe kusungama.

Bumbote ya Yave me fuluka na ntoto.

6 Na mambu ya Yave, mazulu yilamaka.

Na mupepe ya yinwa ya yandi, bambwetete, ngonda mpe ntangu yilamaka.

7 Yandi ke vukisaka maza ya mubu na kisika mosi.

Yandi ke tulaka maza na kati ya bibumbulu.

8 Bika ti ntoto nyonso kuzitisa Yave!

Bika ti bantu nyonso yina ke zingaka na yinza kutekita na ntadisi ya yandi!

9 Ya tsyelika, yandi ke tubaka, dyambu ke salamaka,

yandi ke tumisaka, dyambu ke yilamaka.

10 Yave ke balulaka mabanza ya bayinsi,

yandi ke kabikisaka mayindu ya bantu.

11 Yina Yave me kubika, yawu ke zingilaka bantangu nyonso,

mabanza ya ntima ya yandi ke zingilaka bambandu na bambandu.

12 Kyese na yinsi yina Yave kele Nzambi ya bawu,

kyese na bantu yina Yave me soola mutindu mvwilu ya yandi!

13 Katuka kuna na mazulu,

Yave ke talaka bantu nyonso.

14 Kuna na kisika yina yandi ke vwandaka,

yandi ke talaka bantu nyonso yina kele awa na ntoto.

15 Ni yandi yidikaka bantima ya bantu nyonso,

yandi ke talaka mbote-mbote nyonso yina bawu ke salaka.

16 Na mvita, ntinu ke vuukaka ve samu na nkonga ya nene ya binwani ya yandi.

Kinwani ya ngolo ke vuukaka ve na ngolo ya yandi ya mingi.

17 Mpunda ke vuukisaka?

Ve ya kele ya luvunu!

Ngolo nyonso ya mpunda lenda kuula ve!

18 Kasi Yave ke sikikaka meso ya yandi na bayina ke zitisaka yandi,

na bayina ke tulaka ntima na bumbote ya yandi,

19 samu na kukuula bawu na lufwa,

samu ti bawu kuzinga ata na ntangu ya nsatu.

20 Beto ke tulaka ntima na Yave,

yandi kele lusalusu ya beto,

yandi kele kinwanunu ya beto yina ke kebaka nzutu.

21 Ya tsyelika, ntima ya beto ke yangalalaka na yandi,

samu ti beto me tula kivuvu ya beto na Nkumbu ya yandi ya longo.

22 Yave, bika ti bumbote ya nge kuvwanda na beto,

samu ti beto me tula kivuvu na nge!