Kyese na muntu yina ba me lemvokila yimbi ya yandi

mpe ba me fuka disumu ya yandi!

2 Kyese na muntu yina Yave ke na kutala dyaka ve yimbi ya yandi,

muntu yina ke dyaka ve na luvunu na kati ya mpeve ya yandi!

3 Ntangu nyonso yina mu vwandaka ndima ve yimbi ya munu, nzutu ya munu vwandaka konda,

mu vwandaka yawula konso ntangu.

4 Mpimpa na ntangu diboko ya nge vwandaka dema na zulu ya munu.

Mu kumaka ya kulemba mutindu matiti me yuma na ntangu.

5 Mu me zabisa nge disumu ya munu,

mu me bumba ve yimbi ya munu.

Mu me tuba: «Mu ke ndima kondwa kutumama ya munu na ntadisi ya Yave!»

Mpe nge, nge me lemvokila yimbi ya munu,

nge me fuka disumu ya munu.

6 Ni mutindu yina, konso muntu yina me kwikila na nge

ke sambila nge na ntangu ya mbote.

Kana maza ya nene me fuluka,

yawu ke dyamisa yandi ve.

7 Nge kele kiswamunu ya munu,

nge ke kebaka munu na ntangu ya mpasi,

nge ke zungaka munu na milolo ya nkudulu.

8 «Mu ke longisa nge,

mu ke lakisa nge nzila yina nge fwana kulanda.

Mu ke pesa nge malongi,

mu ke sikika meso ya munu na nge.

9 Beno vwanda ve mutindu mpunda, to mpunda ya mutela ya nkufi yina kele ve na mayela.

Ba ke tulaka bawu kisengo na yinwa samu na kutwadisa bawu,

samu na kangimisaka mpe kutwadisaka bawu.

Samu ti bawu kubelama ve na nge.»

10 Muntu ya yimbi ke tala mpasi mingi,

kasi yina ke tulaka kivuvu ya yandi na Yave,

bumbote ya Yave ke zunga yandi.

11 Beno bantu ya kudedama,

beno yangalala na Yave,

beno vwanda na nsayi!

Beno bayina ke na bantima ya kusungama,

beno sala milolo ya nsayi!