Mukunga ya Davidi.

2 Yave, nge kele kiswamunu ya munu,

mu kutala nsoni ve!

Na ludedomo ya nge, kuula munu.

3 Teka dikutu ya nge na kuwa lusambulu ya munu,

kwiza nswalu, vuukisa munu!

Vwanda ditadi ya nene yina ke kebaka munu,

kibaka ya lukengolo yina ke vuukisaka munu!

4 Ya tsyelika, nge kele ditadi ya munu ya nene,

kibaka ya lukengolo yina ke kebaka munu,

samu na Nkumbu ya nge,

nge ke nata munu,

nge ke twadisa munu.

5 Nge ke basisa munu na mutambu yina ba me tambila munu,

samu ti nge kele kibaka ya munu ya lukengolo,

6 mu me vutula mpeve ya munu na maboko ya nge,

nge me kuula munu, Yave, Nzambi ya tsyelika!

7 Mu ke zolaka ve bayina ke kangamaka na banzambi ya mpamba-mpamba.

Munu, mu me tula kivuvu ya munu na Yave.

8 Mu ke yangalala, mu ke tala kilengi, samu na bumbote ya nge,

samu ti nge me tala kyadi ya munu, nge me zaba mpasi ya munu.

9 Nge me yekula munu ve na maboko ya bambeni,

nge me telemisa munu,

nge me pesa munu kimpwanza.

10 Yave, fwila munu kyadi, samu ti mu ke na mpasi,

meso ya munu, mwela ya munu mpe nzutu ya munu ke na kukwama.

11 Luzingu ya munu ke na kulemba na kati ya mpasi,

bamvula ya luzingu ya munu ke na kuluta na kati ya kuyawula.

Mu ke dyaka na ngolo ve samu na yimbi ya munu,

mpe mikwa ya munu ke na kubeba.

12 Samu na bambeni ya munu nyonso,

mu me kuma muntu ya nsoni,

nsoni ya mingi na ntadisi ya bayina kele pene-pene na munu.

Bayina ke na kutala munu ke na kwendaka kima ntama na munu.

13 Ba me zimbana munu,

mutindu bake zimbanaka muntu ya kufwa,

mu me kuma mutindu kima yina me zimbana.

14 Mu ke na kuwa mambu nyonso ya yimbi yina bantu ke na zonza,

mu kele na boma mingi na balweka nyonso

ntangu ba ke na kuvukana samu na kusala munu yimbi.

Bawu ke na kusala mfundu ya kufwa munu.

15 Kasi munu, mu me tula kivuvu ya munu na nge,

Yave! Mu ke na kutuba: «Nge kele Nzambi ya munu!»

16 Bilumbu ya luzingu ya munu ke na maboko ya nge,

kuula munu na maboko ya bambeni ya munu

mpe na bayina ke na kukwamisa munu!

17 Kyenzola kizizi ya nge na kisyelo ya nge,

vuukisa munu na bumbote ya nge!

18 Yave, mu tala nsoni ve ntangu mu ke bokila nge!

Bika ti bantu ya yimbi kutala nsoni,

bawu vwanda swii na yinsi ya bantu ya kufwa!

19 Kanga yinwa ya bantu ya luvunu,

bayina ke zonzaka na muntu ya kudedama,

kondwa buzitu, na lunangu nyonso mpe kuyina.

20 Yave, bumbote ya nge kele nene mingi!

Yina nge me bumba samu na bayina ke zitisaka nge,

bumbote yina nge ke lakisaka na bayina nyonso

ke kuzwaka kiswamunu ya bawu na sika ya nge, na ntwala ya bantu.

21 Nge me bumba bawu na ntadisi ya nge,

ntama ya bankwamusu ya bantu.

Nge ke bumba bawu na mantwala ya bantu ya luvunu, na Yinzo ya nge ya lele.

22 Nkembo na Yave!

Samu ti yandi me lakisa munu

kukwikama ya ngitukulu na mbanza,

mutindu mbanza yina bambeni me zunga samu na kubotola yawu.

23 Mu vwandaka tuba na nswalu nyonso:

Ba me bingisa munu ntama na kizizi ya nge,

kasi nge me kuwa lusambulu ya munu.

Ntangu mu bokilaka nge na kwiza sadisa munu.

24 Beno zola Yave, beno, mikwikisi ya yandi!

Yave ke bumbaka bayina kele ya kukwikama na yandi,

kasi yandi ke sembaka na ngolo bantu ya lunangu.

25 Beno vwanda na ngolo, beno vwanda na kibakala

beno nyonso yina ke salaka kivuvu na Yave.