Mukunga ya Davidi.

2 Mu ke kembila bunene ya nge, Yave,

nge me telemisa dyaka munu,

nge me bika ve ti bambeni kuseka munu.

3 Yave, Nzambi ya munu,

mu me bokila nge na kwiza sadisa munu

mpe nge me nyakisa munu.

4 Yave, nge me basisa mwela ya munu na yinsi ya bantu ya kufwa,

nge me sala ti mu kuzinga dyaka ntama ya bayina ke kulumukaka na ndyamu.

5 Beno yimbila Yave,

beno mikwikisi ya yandi,

beno kembila Nkumbu ya yandi ya longo.

6 Nkele ya yandi ke zingila ntangu fyoti,

kasi bumbote ya yandi ke zingilaka bantangu nyonso,

na nkokila bidilu me wakana,

kasi na suka nsayi me kwiza.

7 Na kizunu mu vwandaka tuba na kati ya ntima:

Mu lenda kubwa ata fyoti ve!

8 Yave, na bumbote ya nge,

nge me syamisa mongo ya munu na ngolo nyonso.

Kasi nge me bumba kizizi ya nge,

mpe boma me kuzwa munu.

9 Yave, mu me looka na sika ya nge,

mu me bondila Yave.

10 Wapi ndandu nge ke kuzwa kana menga ya munu kutanga,

wapi ndandu kana mu kulumuka na ndyamu?

Fundu-fundu lenda kembila nge?

Fundu-fundu lenda samuna kukwikama ya nge?

11 Yave, kuwa, fwila munu kyadi!

Kwiza sadisa munu!

12 Nge me soba bidilu ya munu na nsayi,

mpe nge me katula munu kinkuti ya munu ya mafwa,

nge me lwatisa munu kinkuti ya feti,

13 na yina, na ntima ya munu nyonso,

mu ke yimbila nge, mu ke dingama ve.

Yave Nzambi ya munu, mu ke kembila nge bantangu nyonso.