1 Nzambi, kuula munu,

nwanina munu na maboko,

ya bantu ya yinsi yina ke zolaka nge ve!

Kuula munu na maboko ya bantu ya luvunu,

bantu yina ke salaka yimbi!

2 Nge kele Nzambi ya munu, kibaka ya munu ya lukengolo,

samu na yinki nge me losa munu?

Samu na yinki mu ke na kwendaka tambula na kati ya kyadi,

na kati ya bankwamusu ya mbeni?

3 Fidisa nsemo ya nge mpe butsyelika ya nge!

Yawu kunata munu na mongo ya nge ya longo!

Yawu kutwadisa munu na Yinzo ya nge!

4 Mu ke belama pene-pene ya kiyokolo ya minkayulu ya Nzambi.

Mu ke belama pene-pene ya Nzambi.

Yandi kele nsayi ya munu mpe kyese ya munu.

Mu ke kembila nge na nsambi!

Oo, Nzambi, nge kele Nzambi ya munu!

5 Samu na yinki mu ke lemba,

samu na yinki mu ke looka?

Tula kivuvu ya nge na Nzambi!

Mu ke kembila dyaka yandi

samu ti yandi kele Muvuukisi ya munu, Nzambi ya munu!