2 Oo, Nzambi beto kuwaka,

bankooko ya beto zabisaka beto,

mambu yina nge salaka na ntangu ya bawu,

na bantangu yina ya ntama.

3 Na lulendo ya nge, nge bingisaka bantu ya bayinsi,

samu na kutula bankooko ya beto kuna.

Nge bulaka bantu samu na kupesa bantu ya nge kisika ya nene.

4 Bawu botolaka ve yinsi na bambele ya bawu ya mvita.

Bawu vuukaka ve na ngolo ya bawu mosi.

Kasi ni na ngolo ya nge ya kulutila.

Ni lulendo ya nge, ni nsemo ya kizizi ya nge,

samu ti nge zolaka bawu.

5 Ni nge kele ntinu ya munu, Nzambi ya munu,

tumisa nkudulu ya Yakobi!

6 Kintwadi na nge, beto ke bwisaka bambeni ya beto.

Na Nkumbu ya nge beto ke nikaka mitantu ya beto.

7 Mu me tula ve kivuvu ya munu na munani ya munu.

Mbele ya munu ya mvita ke vuukisa ve munu.

8 Ni nge ke kuulaka beto na maboko ya mitantu ya beto,

ni nge ke fwisaka nsoni bayina ke yinaka beto.

9 Bilumbu nyonso, beto ke na kuyimba mikunga ya nzitusu samu na Nzambi.

Bantangu nyonso, beto ke na kukembila Nkumbu ya nge.

10 Kasi nge me losa beto, nge me fwisa beto nsoni,

nge ke kwendaka dyaka ve na binwani ya beto na mvita.

11 Nge ke na kusala ti beto kuvutuka manima na mantwala ya mitantu ya beto.

Mpe bayina ke yinaka beto ke na kubaka na ngolo bima nyonso ya beto yina bawu zola.

12 Nge ke na kwendaka yekula beto mutindu mameme yina ba ke na kufwa.

Nge me mwangisa beto na kati ya bayinsi ya nzenza.

13 Nge me tekisa bantu ya nge mpampa,

nge me tala ve ntalu ya bawu.

14 Nge me bika ti bafinangani ya beto kufinga beto,

bayina ke na kuzunga beto ke na kuseka mpe ke na kuvweza beto.

15 Nge me bika ti bantu ya bayinsi ya nkaka kuseka beto,

Bawu ke na kuvweza beto na kwendaka ningisa bayintu ya bawu.

16 Bilumbu nyonso, mu ke na kutala nsoni,

nsoni me fuka kizizi ya munu.

17 Mu ke na kuwa ndinga ya bayina

ke na kuvweza beto mpe ke na kufinga beto,

mbeni yina ke kaka na nsatu ya kuvutula munu yimbi.

18 Mambu nyonso yayi me kumina beto,

kasi beto, beto me zimbana nge ve,

beto me kufwa ve ngwisani ya nge.

19 Beto me vutuka ve manima,

beto me bika ve nzila ya nge.

20 Kasi nge, nge me nika beto na yinsi ya kuyuma,

nge me kotisa beto na kitombe ya lufwa.

21 Kana beto zimbanaka Nkumbu ya nge, Nzambi ya beto,

kana beto nangunaka maboko ya beto,

samu na kusambila banzambi ya nzenza,

22 nge Nzambi yina zaba mansweki ya ntima ya muntu,

nge zolaka bakula yawu ve?

23 Samu na nge, ba ke na kufwa beto ntangu nyonso.

Ba ke na kutala beto mutindu mameme,

yina ba ke na kunaka na kisika yina ba ke kufwaka bibulu.

24 Mfumu telama, samu na yinki nge ke na kulala?

Vumbuka! Kulosa beto ve ya mankululu!

25 Samu na yinki nge me bumba kizizi ya nge?

Samu na yinki nge me zimbana mpasi mpe nkwamusu ya beto?

26 Ya tsyelika, beto kele ya kulemba na kati ya fundu-fundu,

bivumu ya beto me vukana na ntoto.

27 Telama samu na kwiza sadisa beto!

Kuula beto samu na kukwikama ya nge!