45
Mukunga samu na makwela ya ntinu
1 Mukunga ya luzolo. Mukunga ya bana ya Kole yina ba yimbilaka na muningu ya nsambi, na lutwadusu ya mfumu ya miyimbidi.
2 Mambu ya mbote ke na kutoka na ntima ya munu.
Mu ke tuba: Mu ke yimbila mukunga samu na ntinu ya munu!
Mu zola ti yinwa ya munu kuvwanda
mutindu kisonokono ya kisoniki yina zaba mbote kisalu.
3 Nge me lutila bantu nyonso na kitoko.
Mambu ya yinwa ya nge ke ya mbote,
ni yawu yina Nzambi me sakumuna nge ya mankululu.
4 Nge kinwani ya kibakala, kanga mbele ya nge ya mvita na luketo,
yawu kele kidimbu ya kitoko ya nge mpe nkembo ya nge.
5 Ee, na nkembo ya nge, vwanda kinungi.
Yuluka na pusu-pusu ya nge ya mvita,
nwanina butsyelika, lembami, ludedomo!
Bika ti diboko ya nge ya lubakala kusala mambu ya ngitukulu.
6 Madyonga ya nge kele na bansongi ya mbote,
yawu ke na kukota na ntima ya bambeni ya ntinu
bantu ke na kubwa na yisi ya makulu ya nge.
7 Nzambi, kiti ya nge ya kintinu kele ya bantangu nyonso.
Mukawa ya lutumu ya nge kele mukawa yina ke sungikaka.
8 Nge ke zolaka mambu ya kudedama,
mpe nge ke mangaka mambu ya yimbi.
Ni yawu yina, Nzambi yina kele Nzambi ya nge,
me byeka nge na mafuta ya kyese,
mpe me soola nge na kati ya bampangi ya nge.
9 Mananasi ya mile, ya alowese na ya kanele,
yawu ke na kupesa nsunga ya mbote na binkuti nyonso ya nge.
Katuka na bayinzo ya ntinu yina ba bongisaka na meno ya nzawu,
muningu ya bansambi ke na kuyangidika nge.
10 Bandumba ya bantinu kele na kati-kati ya bayina nge ke zolaka mingi.
Kento ya ntinu kele ya kutelama na lweka ya lubakala.
Yandi me tula bima ya wolo ya Ofile na nzutu.
11 Mwana ya munu ya kento, tala mpe kuwa mbote,
zimbana bantu ya nge mpe dikanda ya nge!
12 Ntinu me zola kitoko ya nge,
yandi kele mfumu ya nge,
fukama na mantwala ya yandi.
13 Bandumba ya yinsi ya Tile, ke kwiza natina nge makabu ya bawu,
samu na kuzwa bumbote ya nge, mutindu mosi mpe bayina ke na bimvwama mingi.
14 Ndumba ya ntinu ke na kulezima na kati ya yinzo ya kintinu.
Yandi kele ya kulwata kinkuti yina ba bongisaka na wolo.
15 Ba me nata yandi na sika ya ntinu.
Yandi kele ya kulwata binkuti yina kele na bantinta mingi.
Na manima ya yandi, bandumba, bandiku ya yandi.
Ba ke na kunata bawu samu na nge.
16 Ba ke na kunata bawu na nsayi mpe na kyese mingi,
bawu ke na kukota na yinzo ya ntinu.
17 Bana ya nge ke baka kisika ya bankooko ya nge.
Nge ke tula bawu mutindu bamfumu na kati ya yinsi nyonso.
18 Mu ke zonzila Nkumbu ya nge bambandu na bambandu,
na yina bantu ke kembila nge bantangu nyonso.