46
Yave yina yidikaka yinza kele na beto
1 Mukunga ya bana ya Kole yina ba yimbilaka na lutwadusu ya mfumu ya miyimbidi. Ba yimbilaka yawu na nsambi yina ke pesaka ndinga ya fyoti.
2 Nzambi kele kiswamunu mpe kiyekamanu ya beto,
yandi ke kondwaka ve na kusadisa beto na kati ya bampasi.
3 Ni yawu yina, beto kele ve na boma ata ti ntoto kuningana,
ata ti myongo kubwa na kati-kati ya mubu,
4 mpe ti bimpo ya maza kutomboka, kunanguka, kusala makelele, kuningisa myongo.
Kupema
5 Yawu kele nzadi yina bamwila ya yawu ke na kuyangidika mbanza ya Nzambi,
na kivinga ya kulutila longo, ya Yinzo ya Nzambi ya Kulutila Kuzangama.
6 Nzambi ke na kati-kati ya mbanza yina,
mbanza yango ke kubwa ve.
Nzambi ke sadisaka mbanza kubanda ntangu bwisi ke kutsyaka.
7 Bayinsi ke na kuningana,
bayinsi ya kintinu ke na kubwa.
Nzambi ke na kuwakisa ndinga ya yandi,
mpe ntoto ke na kubulumuka.
8 Yave Nzambi ya Binwani kele na beto.
Nzambi ya Yakobi kele kibaka ya lukengolo ya beto.
Kupema
9 Beno kwiza tala mambu yina Yave me sala,
mwangusulu yina yandi me lungisa na ntoto!
10 Yandi ke sukisaka bamvita tii na bandilu ya ntoto.
Yandi ke zengaka munani,
yandi ke bukaka dyonga.
Yandi ke yokaka bapusu-pusu ya mvita.
11 Beno vwanda swii,
beno fwana kuzaba ti mu kele Nzambi.
Mu ke na kuyala na makanda nyonso ya bantu,
mu ke na kuyala na ntoto nyonso.
12 Yave Nzambi ya Binwani kele na beto.
Nzambi ya Yakobi kele kibaka ya lukengolo ya beto.
Kupema