2 Ntangu Dowenge, mu-Edome kwizaka zabisa Sawule mutindu yayi: «Davidi me kwenda na sika ya Ayimeleke.»

3 Nge kinwani yina ke na kibakala,

samu na yinki nge ke na lunangu na kusala yimbi?

Kukwikama ya Nzambi ke zingilaka bantangu nyonso.

4 Yinwa ya nge ke basisaka mambu yina ke mwangisaka,

ludimi ya nge kele mutindu kilwazi,

yina ba me lengula, yawu zaba kuvuna.

5 Nge ke zolaka yimbi mpe nge ke yinaka mambu ya mbote,

nge ke zolaka luvunu, mpe nge ke yinaka mambu ya kudedama.

6 Nge ke zolaka mambu yina ke mwangisaka,

yinwa ya nge ke basisaka kaka mambu ya luvunu.

7 Na yina, Nzambi ke mwangisa nge ya mankululu.

Yandi ke bwisa mpe ke katula nge na yinzo ya nge ya lele.

Yandi ke katula nge na yinsi ya bantu ya moyo.

8 Bantu ya kusungama ke tala mambu yina,

bawu ke vwanda na boma, mpe bawu ke seka yandi:

9 «Yayi ni muntu yina vwandaka tala ve Nzambi mutindu kiswamunu ya yandi,

kasi yandi vwandaka tula kivuvu ya yandi na bimvwama ya yandi ya mingi.

Yandi vwandaka bumbama na kati ya kumwangisa yina yandi vwandaka mwangisa.»

10 Kasi munu, mu kele na Yinzo ya Nzambi mutindu yinti ya olive,

yina kele na makasa ya malu-malu

Mu me tula kivuvu ya munu na kukwikama ya Nzambi bantangu nyonso, mpe ya mankululu.

11 Mu ke kembila nge bantangu nyonso, samu na mambu yina nge me sala.

Mu me tula kivuvu na Nkumbu ya nge,

samu ti nge kele mbote,

samu na bayina kele ya kukwikama na nge.