51
Lusambulu samu na kuzwa mulemvo
1 Mukunga ya Davidi, mukunga yina ba twadisaka na mfumu ya miyimbidi. 2 Ntinu Davidi vukisaka mfulu na Bateseba.
Mumbikudi Natane kwendaka tala Davidi mpe Davidi tubaka:
3 Nzambi, tala munu kyadi nge yina kele mbote,
luzolo ya nge kele ya nene, katula masumu ya munu.
4 Sukula munu samu na kukatula yimbi ya munu nyonso,
vedisa munu samu na kukatula masumu ya munu.
5 Ya tsyelika, mu me ndima yimbi yina mu me sala,
disumu ya munu kele ntangu nyonso na mantwala ya munu.
6 Kaka ni na nge mu me sala disumu.
Mu me sala mambu ya kulunga ve na nge.
Nge kele ya kudedama na banzengolo ya nge,
bamfundusu ya nge kele ya kufwanakana.
7 Mu butamaka na kati ya disumu,
mama ya munu kuzwaka kivumu ya munu na kati ya masumu.
8 Kasi nge ke zolaka ti butsyelika kuvwanda na kati ya ntima ya munu,
sala ti mu zaba ndwenga ya nge na kati ya mwela ya munu.
9 Katula disumu ya munu na mukwisa, mu ke kuma ya kuvedila,
sukula munu mpe mu ke kuma mpembe ya kulutila.
10 Sala ti mu kuwa mikunga ya nsayi ya kulutila mpe ya kilengi,
mikwa yina nge me nika ke yangalala.
11 Balula kizizi ya nge samu ti,
nge tala ve masumu ya munu,
katula yimbi ya munu nyonso.
12 Sala ti ntima ya munu vwanda ya kuvedila,
tula na kati ya munu ntima ya mbote.
13 Kulosa munu ve ntama na nge,
kukatula munu ve mpeve ya nge ya longo.
14 Vutula munu nsayi ya mpulusu ya nge,
mpe ti mpeve ya nge ya mbote kusimba munu.
15 Mu ke longisa bantu yina ke tumamaka ve na nge mutindu bawu fwana kusala.
Misumuki ke vutuka na sika ya nge.
16 Nzambi, Muvuukisi ya munu, kuula munu na mpasi ya lufwa,
mpe yinwa ya munu ke samuna ludedomo ya nge.
17 Mfumu fungula bikoba ya munu,
mpe yinwa ya munu ke yimbidila nge mikunga ya nzitusu.
18 Ya tsyelika, nge ke yangalalaka ve na minkayulu,
nge ke ndimaka ve minkayulu ya kuyoka,
kana ya vwandaka ve mutindu yina, mu zolaka pesa nge yawu.
19 Minkayulu yina Nzambi ke ndimaka, ni mpeve ya kukuluka.
Ntima ya kukuluka, ntima yina ke nyongaka samu na masumu ya yandi,
Nzambi ke yinaka ve yawu.
20 Na kati ya bumbote ya nge,
sala mambu ya mbote na Siyone,
tunga bibaka ya Yelusalemi.
21 Na yina, nge ke yangalala na minkayulu,
yina Musiku ke na kulomba,
makabu na minkayulu ya kuyoka,
ba ke yoka bangombe ya mbakala,
na kiyokolo ya nge ya minkayulu.