Yave, Nzambi ya banzambi, me tuba,

yandi me bokila bantu ya ntoto,

kubanda na kisika yina ntangu ke basikilaka,

tii na kisika yina ntangu ke lalaka.

2 Kuna na Siyone, mbanza ya kitoko ya kulutila,

Nzambi ke na kutalana na nkembo ya yandi.

3 Nzambi ya beto ke na kukwiza,

yandi kuvwanda ve swii.

Na ntadisi ya yandi, ya kele na tiya ya kusakana ve.

Kitembo ya ngolo ke zungaka kisika yina yandi kele.

4 Kuna na mazulu, Nzambi me bokila zulu na ntoto,

samu na kusala lufundusu ya bantu ya yandi.

5 Nzambi tubaka: «Beno kutikisa munu bayina kele ya kukwikama na munu,

bayina salaka ngwisani na munu na munkayulu.»

6 Zulu ke tuba ti Nzambi kele ya kudedama,

Ya tsyelika ni Nzambi kele zuzi.

7 Bantu ya munu, beno kuwa,

mu ke tuba na beno,

Isayeli, mu ke kebisa nge.

Mu kele Nzambi, Nzambi ya nge.

8 Ya kele ve samu na minkayulu ya beno,

mu ke na kusemba beno,

minkayulu ya beno ya kuyoka kele konso ntangu,

na mantwala ya munu.

9 Mu ke baka ve ngombe ya mbakala na yinzo ya nge,

to bankombo ya mbakala na bampaka ya nge.

10 Ya tsyelika, bibulu nyonso ya mfinda kele ya munu,

mafunda na mafunda ya bibulu ya myongo kele ya munu.

11 Mu zaba bandeke nyonso ya myongo.

Bibulu nyonso ya mfinda kele ya munu.

12 Kana mu vwandaka na nsatu, mu zolaka zabisa nge yawu ve.

Ya tsyelika, yinza kele ya munu,

nyonso yina kele na yinza kele ya munu.

13 Mu ke kudyaka musuni ya bangombe ya mbakala?

Mu ke kunwaka menga ya bankombo ya mbakala?

14 Pesa munkayulu ya matondo na Nzambi.

Lungisa bansilulu ya nge na ntadisi ya Nzambi ya Kulutila Kuzangama.

15 Bokila munu na kilumbu ya mpasi,

mu ke kuula nge mpe nge ke kembila munu.

16 Kasi na muntu ya yimbi, Nzambi ke na kutuba:

Yinki kwandi? Nge ke na kutanga bansalulu ya misiku ya munu.

Nge ke na ngwisani ya munu na yinwa,

17 nge yina ke yinaka malongi,

mpe ke mangaka mambu ya munu!

18 Ntangu nge ke talaka muyibi,

nge ke yangalalaka na yandi,

nge ke vukanaka na bantu ya kinsuza.

19 Yinwa ya nge ke basisaka mambu ya yimbi,

ludimi ya nge ke butaka mambu ya luvunu.

20 Ntangu nge ke vwandaka na bantu, nge ke tongaka mpangi ya nge,

nge ke safulaka mwana ya mama ya nge.

21 Tala mambu yina nge me sala,

mpe mu me vwanda swii.

Nge me banza ti mu kele mutindu nge.

Kasi mu ke semba nge,

mu ke basisa mambu ya nge nyonso na ngaanda.

22 Beno yina ke zimbanaka Nzambi, beno simba mambu yayi,

samu ti mu pasula beno ve kondwa muntu kwiza kuula beno.

23 Muntu yina ke pesa munu munkayulu ya matondo,

yandi me kembila munu.

Muntu yina ke na nkadulu ya mbote, mu ke lakisa ti mu kele Muvuukisi ya yandi.