49
Na kilumbu ya lufwa muntu ke nataka ata kima
1 Mukunga ya bana ya Kole yina ba yimbilaka na lutwadusu ya mfumu ya miyimbidi.
2 Bantu nyonso, beno kuwa, beno teka makutu,
beno bantu nyonso yina kele na yinza,
3 beno nyonso, bakuluntu mpe bana ya fyoti,
bamvwama mpe bamputu!
4 Yinwa ya munu ke na kusamuna mambu ya ndwenga,
ntima ya munu ke na kuyindula mambu ya mayela.
5 Mu me teka makutu samu na kuwa mukunga.
Mu ke bangula nongo na muningu ya nsambi.
6 Samu na yinki mu ke tala boma na kilumbu ya mpasi,
ntangu bantu ya yimbi ke zunga munu,
samu na kusala munu yimbi?
7 Bawu ke na kutula kivuvu ya bawu na mvwilu ya bawu,
bawu ke na lunangu samu na bimvwama ya bawu.
8 Muntu ve lenda kuula mpangi ya yandi,
to ata muntu ve lenda futa mbongo na Nzambi,
samu na kukuula luzingu ya yandi mosi.
9 Ntalu ya kukuula bawu kele ya kulutila mingi,
yawu lenda kusalama ve.
10 Bawu ke zinga ya mankululu?
Bawu ke kota ve na ndyamu?
11 Kasi beto ke na kutala:
Bantu ya ndwenga ke na kufwa,
kizoba mpe muntu yina kele ve na mayela,
bawu ke na kuzimbana na ntoto,
bawu ke na kubika bamvwilu ya bawu na bantu ya nkaka.
12 Bawu ke na kubanza ti,
bayinzo ya bawu ke zingila bantangu nyonso.
Bisika yina bawu ke na kuzinga,
ke zingila bambandu na bambandu,
bawu pesaka bankumbu ya bawu na bantoto,
yina bawu vwandaka zinga.
13 Kasi muntu yina ba ke na kuzitisa mingi, ke zingilaka ve.
Yandi kele mutindu bibulu yina ke na kufwa.
14 Yayi ni nzila ya bawu,
buzoba ya bawu mpe bayina ke landaka bawu,
ke na kuyangalala na mambu yina bawu ke tubaka.
Kupema
15 Ba ke tula bawu na kati ya yinsi ya bantu ya kufwa mutindu nkonga ya mameme,
lufwa ke vwanda muvungi ya bawu,
bantu ya kusungama ke dyata bawu,
kitoko ya bawu ke zimbana,
yinsi ya bantu ya kufwa kele kisika ya bawu.
16 Kasi Nzambi ke kuula munu na yinsi ya bantu ya kufwa,
samu ti yandi ke baka munu.
Kupema
17 Kutala boma ve kana muntu me kuzwa bimvwama.
Kutala boma ve kana yinzo ya yandi me kufuluka na bima.
18 Ntangu yandi ke kufwa yandi ke nata ata kima,
bimvwama ya yandi ke landa yandi ve na kati ya ndyamu.
19 Na bilumbu ya luzingu ya yandi,
yandi vwandaka tala ti,
luzingu ya yandi kele ya kusakumunwa.
Bantu ke zitisa nge samu ti,
nge me zinga na kati ya buyenge.
20 Kasi nge ke kwenda vukana na mbandu ya bankooko ya nge.
Bawu yina ke tala dyaka ve nsemo.
21 Muntu yina ke na kuzwa nzitusu mpe kele ve na mayela,
yandi kele mutindu bibulu yina ke na kufwa.