55
Lusambulu ya muntu yina ba me yekula
1 Mukunga ya Davidi. Mukunga yina ba twadisaka na mfumu ya miyimbidi, ba ke yimbilaka yawu na muningu ya nsambi.
2 Nzambi, teka makutu na kuwa lusambulu ya munu,
kubumbama ve ntangu mu ke na kubondila nge.
3 Kuwa munu, pesa munu mvutu.
Mu ke na kudyengila bisika nyonso, mu ke na boma,
4 ntangu mu ke na kuwa mambu yina bambeni ke na kutuba,
ntangu mu ke na kutala nkwamusu
yina bantu ya yimbi ke na kukwika munu.
Bawu ke na kutula yimbi na yintu ya munu,
na nkele nyonso, bawu ke na kufunda munu.
5 Ntima ya munu ke na kutekita na kati ya munu,
boma ya lufwa ke na kubwidila munu.
6 Boma na kutekita me fuluka na kati ya munu,
mu kele na kati ya kutekita ya kulutila.
7 Mu vwandaka tuba: «Kana munu vwandaka na mapapu mutindu dibembe.
Mu zolaka dumuka, mu zolaka kuzwa kisika ya nkaka samu na kwenda zinga.
8 Mu zolaka kima ntama mingi,
mu zolaka kwenda zinga na yinsi ya kuyuma.
Kupema
9 Mu ke kima mbangu mingi,
mu ke kima mbangu kulutila mupepe ya ngolo,
mu ke kima kulutila kitembo ya ngolo.»
10 Mfumu, tula nkabwani na kati ya bawu,
tula nkabwani na banzonzolo ya bawu.
Na kati ya mbanza, mu ke na kutala mambu ya yimbi mpe kuswana.
11 Mpimpa na ntangu,
bawu ke na kuzungidila bibaka ya mbanza,
yimbi na nkwamusu ke na kati ya mbanza.
12 Kaka ni mwangusulu kele na kati ya yawu,
yimbi na luvunu me kangama na yawu.
13 Kana ya kele mbeni ke na kufinga munu, mu zolaka vibidila,
Kana ya kele muntu yina ke yinaka munu ke na kutelemina munu,
mu zolaka bumbama yandi.
14 Kasi ya ke ni nge muntu mutindu munu,
mpangi ya munu ya ntima, nge yina mu me zaba mbote.
15 Kintwadi, beto na beto ke na kuzabisa bampangi mansweki,
na nkonga ya bantu mingi,
mutindu muntu mosi,
beto ke na kukwenda na Yinzo ya Nzambi.
16 Na mpamukunu, bika ti lufwa kubwidila bambeni ya munu,
bika ti bawu kwenda ya moyo na yinsi ya bantu ya kufwa,
samu ti yimbi ke na kuzinga na kati ya bawu,
yawu kele na kati ya bawu.
17 Munu, mu ke bokila Nzambi,
Yave ke vuukisa munu.
18 Na suka, na midi mpe na nkokila, mu ke yawula,
mu ke na kulooka, yandi me kuwa munu.
19 Na kizunu nyonso, yandi me kuula munu na bamvita,
yina bambeni vwandaka nwanisa munu,
ntangu yina bantu mingi vwandaka nwanisa munu.
20 Nzambi ke kuwa mpe yandi ke fwisa bawu nsoni,
yandi yina ke na kuyala katuka bantangu ya ntama.
Kupema
Ya tsyelika na kati ya bawu, nsobolo kele ve,
bawu ke zitisaka ve Nzambi.
21 Bantu yina ke na kizunu na yandi,
yandi me talisa bawu mpasi,
yandi me safula ngwisani yina yandi salaka.
22 Yinwa ya yandi me lutila lembami na mafulu ya miliki,
kasi kaka mambu ya mvita ke na ntima ya yandi.
Mambu yina ke basikaka na yinwa ya yandi,
me lutila lembami na mafuta,
na kutala mbote,
yawu kele mbele ya mvita yina kele ve na kati ya nkutu ya yawu.
23 Yekula mufuna ya nge na Yave,
yandi ke pesa nge nyonso yina nge ke na yawu nsatu.
Yandi ke bika ata fyoti ve ti muntu ya kudedama kubwa.
24 Kasi nge Nzambi, nge ke kulumuna bawu na kati ya ndyamu,
bawu yina ke sadilaka luvunu mpe ke kufwaka bantu.
Bawu ke tala ve ata ndambu ya bilumbu ya luzingu ya bawu,
kasi munu, mu me tula kivuvu ya munu na nge.