56
Muntu yina ba ke na kukwamisa me kukipesa na Nzambi
1 Mukunga ya Davidi. Mukunga yina ba twadisaka na mfumu ya miyimbidi. Ba yimbilaka yawu na muningu ya «Dibembe ya batelembente ya bizunga ya ntama.» Ba yimbilaka yawu ntangu ba-Filiseti simbaka Davidi kuna na Ngate.
2 Nzambi ya munu, tala munu kyadi, samu ti bantu ke na kukwamisa munu,
bawu ke na kunwanisa munu ntangu nyonso, bawu ke na kukwamisa munu.
3 Nzambi ya Kuzangama, bilumbu nyonso, bambeni ya munu ke na kukwamisa munu,
bawu kele mingi mpe bawu ke na kunwanisa munu.
4 Kilumbu mu ke vwandaka na boma,
ni na nge mu ke tulaka kivuvu ya munu.
5 Mu ke na kukembila Nzambi samu na mambu ya yandi.
Mu me tula kivuvu ya munu na Nzambi, mu ke ve na boma.
Yinki muntu lenda sala munu?
6 Bilumbu nyonso, bawu ke na kubalula mambu yina mu ke na kutuba,
bawu ke na kubanzila munu kaka mambu ya yimbi.
7 Bawu ke na kusadila munu bamfundu,
bawu me bumbama samu na kwendaka landa makulu ya munu,
samu ti bawu ke na kusosa lufwa ya munu.
8 Na kusala yimbi, bawu ke na kubanza ti bawu ke vuuka.
Nzambi na nkele ya nge, bwisa bantu yina.
9 Nge ke na kutanga bambala yikwa mu ke na kwendaka yima-yima,
tula mansangasa ya munu na kati ya mayuki ya nge,
yawu kele ve ya kusonama na kati ya dibuku ya nge?
10 Kilumbu yina mu ke looka na sika ya nge,
bambeni ya munu ke vutuka manima.
Mu zaba ti Nzambi kele na munu.
11 Mu ke na kukembila Nzambi samu na mambu ya yandi!
Mu ke na kukembila Yave samu na mambu ya yandi!
12 Mu me tula kivuvu ya munu na Nzambi, mu ke ve na boma.
Yinki muntu lenda sala munu?
13 Nzambi, mu ke lungisa balukanu yina mu bakaka.
Mu ke pesa nge minkayulu ya matondo.
14 Nge me kuula munu na mpasi ya lufwa,
nge me sala ti mu kubwa ve,
samu ti mu tambula na mantwala ya Nzambi
na kati ya nsemo ya bantu ya moyo.