57
Mu me sambila Nzambi ya Kulutila Kuzangama
(Mga 57.8-12; 108.2-6)
1 Mukunga ya Davidi. Mukunga yina ba twadisaka na mfumu ya miyimbidi. Ba yimbilaka yawu na muningu ya mukunga «Kumwangisa ve!» Ntangu Davidi kwendaka bumbama na kati ya ntadi samu na kukima Sawule.
2 Nzambi fwila munu kyadi, fwila munu kyadi!
Ni na sika ya nge mu me kwiza bumbama,
mu me bumbama na mpewo ya mapapu ya nge, tii mpasi ke luta.
3 Mu ke na kusambila Nzambi ya Kulutila Kuzangama,
Nzambi yina ke salaka nyonso samu na munu.
4 Katuka kuna na zulu, yandi ke fidisa munu mpulusu,
yandi ke semba bayina ke na kukwamisa munu mpe ke na kufinga munu.
Kupema
Nzambi ke lakisa munu kukwikama mpe luzolo ya yandi.
5 Mu kele na kati-kati ya bankosi,
bantu yina ke basisaka tiya na yinwa me zunga munu,
meno ya bawu kele mutindu madyonga na makonga,
baludimi ya bawu kele mutindu mbele ya mvita yina ba me lengula.
6 Nzambi telama na zulu ya mazulu,
bika ti nkembo ya nge kuvwanda na zulu ya ntoto nyonso!
7 Bawu sadilaka munu mutambu na nzila, mu zolaka kubwa,
bawu timunaka dibulu na mantwala ya munu.
Bawu mosi me kubwa na kati.
Kupema
8 Nzambi ya munu, ntima ya munu kele ya kusyama!
Ntima ya munu kele ya kusyama.
Mu ke yimbidila, mu ke yimbidila nge mikunga na bisikulu ya munu.
9 Vumbuka, nkembo ya munu!
Beno vumbuka, beno bansambi!
Mu ke vumbula nsemo ya suka-suka.
10 Mfumu, mu ke kembila nge na kati ya makanda ya bantu,
mu ke yimbidila nge na kati ya bayinsi,
11 kukwikama ya nge ke na kukuma tii na mazulu,
butsyelika ya nge ke na kukuma tii na matuti.
12 Nzambi telama na zulu ya mazulu,
bika ti nkembo ya nge kuvwanda na zulu ya ntoto nyonso!