59
Kuula munu na maboko ya bambeni ya munu
1 Mukunga ya Davidi. Mukunga yina ba twadisaka na mfumu ya miyimbidi. Ba yimbilaka yawu na muningu ya mukunga «Kumwangisa ve!» Na ntangu yina Sawule tumisaka bantu na kwenda kengidila yinzo ya Davidi samu na kufwa yandi.
2 Kuula munu na maboko ya bambeni ya munu!
Nzambi ya munu, nanguna munu na zulu kulutila bantu yina ke na kutelemina munu!
3 Kuula munu na maboko ya bantu ya yimbi!
Vuukisa munu na maboko ya mivondi!
4 Bawu me bumbama samu na kusala munu yimbi!
Bantu ya lulendo ke na kusadila munu mfundu ya yimbi!
Yave, mu me kufwa bantu ve, mu me sumuka ve!
5 Mu me sala ve yimbi, kasi bawu ke na
kulanda munu mbangu, bawu me kubama.
Vumbuka, kwiza bwabana munu mpe tala!
6 Nge, Yave, Nzambi ya Binwani, Nzambi ya Isayeli,
telama samu na kufutisa bayinsi nyonso yimbi ya bawu!
Kulakisa ve bumbote ya nge na ata mosi ya bantu yayi ya yimbi!
Kupema
7 Bawu me vutuka na nkokila,
bawu me lola mutindu bayimbwa.
Bawu me zunga mbanza na kwendaka tambula.
8 Bawu me basisa mambu ya yimbi na bayinwa ya bawu.
Mambu ya bawu kele mutindu mbele ya mvita,
nani ke kuwa bawu?
9 Kasi nge Yave, nge ke na kuseka bantu yina,
nge ke na kuseka bantu ya bayinsi nyonso.
10 Nzambi nge kele ngolo ya munu, mu me tula kivuvu ya munu na nge.
Nzambi kele kiswamunu ya munu.
11 Nzambi ya munu kele mbote,
yandi ke kwiza na mantwala ya munu,
yandi ke sala ti mu tala kubwa ya bambeni ya munu.
12 Kufwa bawu ve, kana ve bantu ya munu ke zimbana bawu.
Na lulendo ya nge, sala ti bawu kwendaka yima-yima, sala ti bawu kubwa.
Mfumu, nge kele kinwanunu ya beto yina ke kebaka nzutu.
13 Bayinwa ya bawu ke na kusumuka na mambu yina ke na kubasika na bikoba ya bawu.
Bika ti bawu kubwa na lunangu ya bawu mosi,
kinzonzi ya bawu ke kaka nsingulu mpe luvunu.
14 Na kati ya nkele ya nge, manisa na kufwa bawu!
Manisa na kufwa bawu, mpe ti ba tala dyaka bawu ve!
Ba ke zaba ti Nzambi ke na kuyala na Isayeli, tii na bandilu ya ntoto.
Kupema
15 Bawu me vutuka na nkokila,
bawu me lola mutindu bayimbwa.
Bawu me zunga mbanza na kwendaka tambula.
16 Bawu ke na kwenda yima-yima na kwendaka sosa kima ya kudya.
Bawu ke na kulutisa mpimpa ata kuyukuta.
17 Kasi munu, mu ke yimbila ngolo ya nge,
na suka, mu ke kembila kukwikama ya nge.
Nge kele mbanza ya munu ya kutungama na bibaka ya lukengolo,
kiswamunu ya munu na ntangu ya mpasi.
18 Nge kele ngolo ya munu,
mu ke yimbila samu na nge.
Ya tsyelika, nge Nzambi, nge kele mbanza ya munu ya kutungama na bibaka ya lukengolo,
nge ke lakisaka munu luzolo ya nge.