60
Nzambi me kuwa lusambulu ya bantu ya yandi
(Mga 60.7-14; 108.7-14)
1 Mukunga ya Davidi. Mukunga yina ba twadisaka na mfumu ya miyimbidi. Ba yimbilaka yawu na muningu ya nsambi. Mukunga ya kimbangi samu na kulonga bantu, 2 ntangu yandi nwanisaka bantu ya yinsi ya Alame ya Mezopotami, na ba-Alame ya Soba. Na kuvutuka ya yandi, Yowabe nungaka bantu ya Edome. Yandi kufwaka mafunda kumi na zole (12 000) ya bantu, kuna na Mudimba ya Mungwa.
3 Nzambi, nge me manga beto, nge me mwangisa beto!
Ata ti nge me dasukila beto, vutula luzingu ya beto mutindu yawu vwandaka!
4 Nge me ningisa ntoto, nge me pasula yawu,
yidika bisika ya kupasuka, samu ti yawu ke na kuningana.
5 Nge me talisa bantu ya nge mpasi ya kulutila,
nge me nwikisa beto malafu yina ke kolaka.
6 Nge me pesa kidimbu ya yinsi na bantu yina ke zitisaka nge,
samu ti bawu kukima na mantwala ya bayina ke sadilaka munani.
Kupema
7 Vuukisa beto na diboko ya nge ya lubakala, pesa beto mvutu,
samu na kukuula bayina nge ke zolaka.
8 Na kati ya Yinzo ya yandi ya longo, Nzambi tubaka mutindu yayi:
«Mu ke nunga, mu ke kabula mbanza Siseme,
mu ke teza mudimba ya Sukote.
9 Ngalaade kele ya munu, Manase kele ya munu!
Efalayime kele yimpu ya munu yina ke kebaka yintu,
Yuda kele mukawa ya munu ya lutumu.
10 Mowabe kele ndonga ya nene yina mu ke yobidilaka.
Mu ke losa dipapa ya munu na yinsi ya Edome.
Yinsi ya ba-Filiseti, sala milolo ya mvita samu na kunwanisa munu.»
11 Nani ke nata munu tii na mbanza ya kutungama na bibaka ya lukengolo?
Nani ke nata munu tii na Edome?
12 Nzambi ni nge ve mangaka beto?
Nzambi ni nge ve vwandaka kwenda dyaka ve na binwani ya beto na mvita?
13 Kwiza sadisa beto, kuula beto na maboko ya mutantu!
Lusalusu ya bantu kele kaka mpamba!
14 Kintwadi na Nzambi, beto ke sala mambu ya ngitukulu.
Yandi ke nika bambeni ya beto.