66
Nzitusu na Nzambi yina ke kuulaka
1 Mukunga yina ba twadisaka na mfumu ya miyimbidi. Mukunga.
Beto sala milolo ya nsayi na Nzambi,
beno bantu nyonso ya ntoto!
2 Beno yimbila nkembo ya Nkumbu ya yandi,
Beno zitisa yandi na mikunga ya nkembo.
3 Beno tuba na Nzambi:
«Mambu yina nge ke salaka kele ya nsisi!
Samu na bunene ya ngolo ya nge, bambeni ya nge ke na kubondila nge.»
4 Bantu nyonso ya ntoto ke fukamaka na mantwala ya nge, bawu ke yimbidilaka nge.
Bantu nyonso ke yimbidilaka Nkumbu ya nge.
5 Beno kwiza tala mavanga ya Nzambi!
Mambu ya nene yina yandi me sala samu na bantu kele ya nsisi.
6 Yandi kitulaka mubu na ntoto ya kuyuma,
bantu sabukaka nzadi na makulu na ntoto ya kuyuma.
Ni kuna beto yangalalaka na yandi.
7 Yandi ke na kuyala bantangu nyonso na lulendo ya yandi,
Meso ya yandi ke na kutala bayinsi nyonso.
Kubika ve ti bantu yina ke tumamaka ve kuyangala!
Kupema
8 Bantu nyonso, beno tonda Nzambi ya beto,
Beno yimbidila yandi na ngolo nyonso, mukunga ya nzitusu!
9 Yandi me pesa beto luzingu,
yandi me sala ti beto kubwa ve.
10 Nzambi, nge me meka beto,
nge me lutisa beto na tiya mutindu palata.
11 Nge me kotisa beto na mutambu,
Nge me kwika beto mufuna ya dema na luketo.
12 Nge me sala ti beto kuvwanda na yisi ya lutumu ya bambeni ya beto.
Beto lutaka na tiya mpe beto lutaka na maza.
Kasi nge basisaka beto kuna samu na kupesa beto bima mingi.
13 Mu ke kota na Yinzo ya nge na minkayulu ya kuyoka.
Mu ke lungisa balukanu yina mu bakaka na ntadisi ya nge.
14 Mu me lungisa bansilulu yina basikaka na yinwa ya munu,
bansilulu yina mu salaka ntangu mu vwandaka na mpasi.
15 Mu ke pesa nge minkayulu ya bibulu ya kuyoka yina kele na mafuta.
Mu ke pesa nge minkayulu ya mameme ya mbakala na maaka ya nsunga ya mbote.
Mu ke pesa nge minkayulu ya bangombe ya mbakala mpe ya bankombo ya mbakala.
Kupema
16 Beno kwiza, beno kuwa, beno nyonso yina ke zitisaka Nzambi.
Mu ke zabisa beno mambu nyonso yina yandi me sala samu na munu.
17 Na yinwa ya munu, mu me bokila yandi,
na ludimi ya munu, mu me yimbidila yandi mikunga ya nzitusu.
18 Kana mu vwandaka na mayindu ya yimbi na ntima ya munu,
Yave zolaka kuwa ve lusambulu ya munu.
19 Na kutala mbote, Nzambi me kuwa munu,
yandi kuwaka mbote-mbote lusambulu ya munu.
20 Nkembo na Nzambi,
yina mangaka ve lusambulu ya munu,
yandi mangaka ve na kulakisa munu bumbote ya yandi!