2 Nzambi me telama, bambeni ya yandi me mwangana,

bayina ke yinaka yandi me kima na mantwala ya yandi.

3 Mutindu mulinga ke mwanganaka,

ni mutindu yina mpe nge ke mwangisaka bawu.

Mutindu mafuta ya nyosi ke sulumukaka na tiya,

ni mutindu yina bantu ya yimbi ke zimbana na mantwala ya Nzambi.

4 Kasi bantu ya kudedama ke na kuyangalala,

bawu ke na kubina na nsayi nyonso na mantwala ya Nzambi.

Bawu me fuluka na kilengi.

5 Beno yimbila samu na Nzambi,

beno yimbidila Nkumbu ya yandi na mikunga,

beno yidika nzila ya muntu yina ke tambulaka na zulu ya matuti, mutindu na zulu ya mpunda.

Nkumbu ya yandi Yave, beno yangalala na mantwala yandi.

6 Tata ya bansaana mpe yina ke nwaninaka mifwidi,

ni Nzambi yina kele na kisika ya yandi ya longo.

7 Nzambi ke pesaka dikanda na bantu yina kele kaka bawu mosi.

Yandi ke kuulaka bankole mpe yandi ke yangidikaka bawu.

Kasi bayina ke tumamaka ve,

bawu ke vwandaka na kisika yina ata kima ve ke menaka.

8 Oo, Nzambi, ntangu nge twadisaka bantu ya nge,

kuna na yinsi ya kuyuma,

9 ntoto tekitaka, mazulu nokisaka mvula na ntadisi ya Nzambi.

Mongo ya Sinayi tekitaka na ntadisi ya Nzambi, Nzambi ya Isayeli.

10 Nzambi nge nokisilaka beto mvula ya mambu ya mbote,

nge kindisaka mvwilu ya nge yina lembaka.

11 Bantu ya nge ke na kuzinga na kisika yina nge Nzambi,

na bumbote ya nge, nge kubikaka samu na bamputu.

12 Mfumu me tuba dyambu,

bakento yina ke nataka nsangu ya mbote,

bawu kele nkonga ya nene ya binwani, bawu tubaka:

13 «Bantinu ya bankonga ya binwani ya bambeni me kima, bawu me kima.

Bakento yina ke bikanaka na bayinzo ke na kukabula bimvwama yina ba kuzwaka na mvita.

14 Ntangu beno ke vwandaka ya kulala na kivwandu ya beno,

mapapu ya dibembe kele ya kufuka na palata,

tinta ya bansala ya yawu kele mutindu ya wolo.

15 Ntangu Nzambi-Mpungu mwangisaka bantinu na balweka nyonso,

neze kubwaka na mongo yina ba ke bokilaka Salemone.»

16 Mongo ya Nzambi, mongo ya Basane,

mongo ya bansongi mingi, mongo ya Basane.

17 Myongo ya bansongi mingi,

samu na yinki beno ke na kusala kimbanda na mongo ya Nzambi?

Kisika yina Nzambi me soola na kuzinga kuna.

Ya tsyelika, Yave ke zinga kuna bantangu nyonso.

18 Bapusu-pusu ya mvita ya Nzambi kele mafunda mingi,

mafunda na mafunda, Yave kele na kati-kati ya yawu.

Mongo ya Sinayi kele na kati ya Yinzo ya longo.

19 Nzambi, nge me kwenda na bisika ya kuzangama, nge me nata bankole,

nge me baka makabu na kati-kati ya bantu,

bantu yina ke tumamaka ve na nge,

bawu mpe ke vwanda pene-pene ya Yave Nzambi.

20 Nkembo na Mfumu, konso ntangu yandi ke na kusadisa beto,

Nzambi yayi kele mpulusu ya beto.

21 Nzambi yayi kele Nzambi ya mpulusu, samu na beto.

Ni Yave Mfumu lenda kuula beto na lufwa.

22 Ya tsyelika, Nzambi ke nika yintu ya bambeni ya yandi,

mikwa ya yintu ya bantu yina ke na bansuki ya yinda,

bantu yina ke salaka yimbi.

23 Yave ke na kutuba: «Mu ke katula bawu kuna na myongo ya Basane,

mu ke basisa bawu na yisi ya mubu,

24 samu ti nge tambula na kati ya menga,

ludimi ya bayimbwa ya nge ke pela menga ya bambeni ya nge.»

25 Oo, Nzambi, ba ke na kutala nkonga ya bantu ya nge,

yina ke na kuluta!

Nzambi ba ke na kutala nkonga ya bantu ya nge,

nkonga ya ntinu ya munu, na kati ya Yinzo ya longo!

26 Miyimbidi ke na kutambula na mantwala,

na manima, ni bantu yina ke sikaka bansambi.

Na kati-kati ni bandumba yina ke sikaka bangoma ya fyoti.

27 Beno tonda Nzambi na kati ya balukutakanu!

Beno tonda Yave beno katuka kuna na yinto ya Isayeli!

28 Ya ntete ni Bezame yina me lutila buntwenya.

Na manima ni bamfumu ya Yuda na nkonga ya bawu ya binwani,

bamfumu ya Zabulone mpe bamfumu ya Nefetali.

29 Nzambi ya nge me tumisa ti nge vwanda na lulendo.

Oo, Nzambi lakisa lulendo ya nge, mutindu nge salaka yawu na ntangu ya ntama samu na beto.

30 Katuka kuna na Yinzo ya nge, nge ke na kuyala Yelusalemi,

bantinu ke na kunatinaka nge makabu.

31 Semba kibulu yina kele na kati ya maza ya batwandu,

semba mpe nkonga ya bangombe ya mbakala na bana ya bangombe ya bantu,

bawu kwiza pesa palata na kuyinama nyonso!

Mwangisa bawu, bawu yina zola bamvita!

32 Bantu ya mfunu ke na kwiza, bawu me katuka na Ngipiti,

bantu ya Kuse ke na kulomba lusalusu na sika ya Nzambi.

33 Bayinsi ya kintinu ya ntoto, beno yimbidila Nzambi.

Beno yimbidila Mfumu mikunga.

34 Beno yimbidila Nzambi yina ke na kwendaka tambulaka na zulu, mutindu na zulu ya mpunda,

zulu ya ntangu ya ntama, yandi ke na kuwakisa ndinga ya yandi, ndinga ya yandi ya lulendo.

35 Beno ndima lulendo ya Nzambi, yandi ke na kuyala Isayeli,

Lulendo ya yandi kele na kati ya matuti.

36 Katuka kuna na Yinzo ya nge,

nge kele Nzambi ya nsisi,

ni nge Nzambi ya Isayeli ke pesaka na bantu ya nge, lulendo na ngolo.

Nkembo na Nzambi!