69
Luzolo ya munu na Yinzo ya nge
1 Mukunga ya Davidi. Mukunga yina ba twadisaka na mfumu ya miyimbidi, ba ke yimbilaka yawu na muningu ya mukunga ya Bifulu
2 Nzambi, vuukisa munu,
mu ke na maza na laka.
3 Mu me dyama na kati ya poto-poto, mu ke na kulenda ve.
Mu me dyama na maza, kisika yina kele sunda,
nyamba ya maza ke na kunata munu.
4 Mu me lemba samu na kulooka yina mu ke na kulooka,
laka ya munu ke na kuyuma!
Meso ya munu me lemba na kuvingila lusalusu ya Nzambi.
5 Bayina ke na kuyina munu ya mpamba, bawu kele na lulendo,
bawu me lutila mingi na bansuki ya munu ya yintu!
Bawu ke na kusosa na kufwa munu!
Bawu ke na kuyina kwandi munu ya mpamba!
Bawu ke na kulomba munu na kuvutula bima yina mu bakaka ve!
6 Oo, Nzambi nge me zaba buzoba ya munu,
yimbi ya munu kele ve ya kubumbama na mantwala ya nge.
7 Bika ti bayina me kwikila na nge kutala ve nsoni samu na munu,
nge Yave, Mfumu ya Binwani!
Bayina ke na kusosa nge,
bawu kuvwanda ve na nsoni samu na munu,
nge Nzambi ya Isayeli!
8 Ya kele samu na nge mu ke na kundima bifingu,
bika ti kizizi ya munu kufuluka na nsoni!
9 Na meso ya bampangi ya munu,
mu me kuma mutindu muntu yina ba me zaba ve.
Na meso ya bana ya mama ya munu,
mu me kuma mutindu nzenza.
10 Luzolo ya munu samu na Yinzo ya nge ke yokaka munu mutindu tiya.
Bifingu ya bantu yina ke na kufinga nge ke na kubwidila munu*Munu Tala na Yne 2.17, Loma 15.3 .
11 Mu ke na kudila, mu ke na kumina-nsoki,
yawu ke na kusala ti ba finga munu.
12 Mu me lwata saki mutindu kinkuti,
bantu ke na kuseka munu.
13 Bantu yina kele ya kuvwanda na kisika yina bantu ke yonzamaka, na nkotolo ya mbanza,
bawu ke na kuzonza yimbi samu na munu.
Mpe bayina ke kolaka malafu ke na kuseka munu na mikunga ya bawu.
14 Yave, mu ke na kupesa nge lusambulu ya munu!
Nzambi, yayi ni ntangu ya kuwa lusambulu ya munu na bumbote ya nge ya mingi!
Pesa munu mvutu, nge kele Muvuukisi ya tsyelika!
15 Kubika ve ti mu dyama na kati ya poto-poto, basisa munu kuna!
Kuula munu na maboko ya bantu yina ke yinaka munu!
Basisa munu na maza, kisika yina kele sunda!
16 Kubika ve ti nyamba ya maza kunata munu!
Kubika ve ti dibulu yina ke sukaka ve, kumina munu.
Kubika ve ti yinwa ya ndyamu kukanga munu.
17 Yave pesa munu mvutu, kukwikama ya nge kele mbote.
Na kyadi ya nge ya nene, tala dyambu ya munu.
18 Kupesa ve munu mukongo, munu kisyelo ya nge.
Mu kele na kati ya mpasi, kwiza mbangu, kwiza pesa munu mvutu!
19 Belama na sika ya munu, kuula munu,
samu na bambeni ya munu, pesa munu kimpwanza.
20 Nge, nge ke na kutala nsoni ya kulutila yina mu me tala,
mpe nsoni yina mu me tala.
Bambeni ya munu nyonso kele na mantwala ya nge.
21 Bifingu ke na kutalisa munu mpasi na ntima, mpe mu ke na kimbevo,
mu ke na nsatu ya muntu yina ke tala munu kyadi,
kasi muntu kele ve.
Mu ke na kusosa muntu yina ke kindisa munu,
kasi mu ke na kuzwa yandi ve.
22 Bambeni ya munu me tula bima ya yimbi na madya ya munu.
Samu na kukatula munu nsatu ya maza, bawu me pesa munu vinu ya ngayi.
23 Bika ti mesa ya bawu kuvwanda mutambu samu na bawu mosi,
mpwasa samu na bantu yina bawu bokilaka.
24 Bika ti meso ya bawu vwanda na kati ya kitombe,
samu ti bawu tala dyaka kima ve,
mpe sala ti bawu vwanda ntangu nyonso
na mukongo ya kukondama!
25 Bika ti nkele ya nge ya kulutila kubwidila bawu,
mpe nkele ya nge kusimba bawu.
26 Bika ti bivwandu ya bawu kumwangana,
bika ti ata muntu mosi ve kuvwanda dyaka na bayinzo ya bawu ya lele.
27 Muntu yina nge me bula, bawu ke na kukwamisa dyaka yandi,
bawu ke na kuzonzila mpasi ya bantu yina nge me kufwa na mbele ya mvita.
28 Bwela yimbi yayi na zulu ya yimbi ya bawu.
Kulemvokila bawu ata fyoti ve.
29 Katula bankumbu ya bawu na kati ya dibuku ya luzingu.
Ba sonika ve bankumbu ya bawu na lutangu ya bantu ya kudedama!
30 Munu, mu kele mputu mpe muntu ya mpasi,
kasi nge Nzambi, lusalusu ya nge ke na kukeba munu.
31 Mu ke kembila nkumbu ya Nzambi na mikunga,
mu ke siika yandi na kuvutula yandi matondo.
32 Yawu ke pesa Yave nsayi, kulutila ngombe,
na mampoka ya yawu, na bikodya ya yawu.
33 Bamputu ke na kutala mpe bawu ke na kuyangalala mutindu yayi:
«Beno bayina ke na kusosa Nzambi, beno vwanda na luzingu ya yinda!
34 Ya tsyelika, Yave ke kuwaka lusambulu ya bamputu,
yandi ke mangaka ve bantu ya yandi, yina kele bankole.
35 Bika ti zulu na ntoto kukembila yandi,
mubu na nyonso yina kele na kati ya yawu kukembila yandi!
36 Ya tsyelika, Nzambi ke vuukisa Siyone,
yandi ke tunga bambanza ya kizunga ya Yuda.
Bantu ya yandi ke kwiza zinga kuna,
yawu ke kuma mvwilu ya bawu.
37 Yawu ke kuma mvwilu ya bana ya bisadi ya bawu.
Bayina ke zolaka Nkumbu ya Yave,
bawu ke kwiza zinga kuna.»