mu kutala nsoni ve!

2 Na ludedomo ya nge, kuula munu,

katula munu na mpasi,

teka dikutu ya nge na kuwa lusambulu ya munu,

mpe vuukisa munu!

3 Vwanda samu na munu ditadi ya nene yina kele kiswamunu samu na munu,

kisika yina mu ke kwizaka bumbama ntangu nyonso.

Nge me baka lukanu ya kuvuukisa munu,

samu ti nge kele ditadi ya munu ya nene, kiswamunu ya munu!

4 Nzambi ya munu, kuula munu na maboko ya muntu ya yimbi,

kuula munu na maboko ya muntu yina kele ve ya kudedama, muntu yina ke na mambu ya ngolo.

5 Ya tsyelika, Yave Mfumu, nge kele kivuvu ya munu.

Mu tulaka ntima ya munu na nge kubanda buntwenya ya munu.

6 Kubanda na kivumu ya mama ya munu,

mu ke yekamaka na nge.

Ni nge basisaka munu na kivumu ya mama ya munu.

Mu ke yimbila nge mikunga ya nzitusu konso ntangu.

7 Na mantwala ya bantu mingi, mu kele mutindu dyambu ya ngitukulu,

kasi nge kele kiswamunu ya munu ya lulendo.

8 Bika ti yinwa ya munu kufuluka na mikunga ya nzitusu.

Bilumbu nyonso, mu ke yimbila mikunga samu na nkembo ya nge!

9 Kumanga munu ve ntangu yayi mu me kuma kiboba,

kubika munu ve ntangu yayi ngolo me manisa munu.

10 Ya tsyelika, bambeni ya munu ke na kuzonza yimbi samu na munu,

bayina ke na kulanda luzingu ya munu,

bawu ke na kusadila munu bamfundu.

11 Bawu ke na kutuba:

«Nzambi me losa yandi,

beno landa yandi, beno bwila yandi.

Ya kele ve na muntu yina ke kuula yandi.»

12 Nzambi, kuvwanda ve ntama na munu!

Nzambi ya munu, kwiza mbangu samu na kusadisa munu!

13 Bayina ke na kutelemina munu,

bika ti bawu kuvwanda na nsoni, bika ti bawu kuzimbana!

Bayina ke na kusosa kusala munu yimbi,

bika ti bawu kufuluka na nsoni, nsoni ya kulutila!

14 Kasi munu, kivuvu ya munu kele kaka na nge,

mu ke tatamana na kukembila nge.

15 Yinwa ya munu ke zonzila ludedomo ya nge,

mu ke samuna mpulusu ya nge bantangu nyonso,

mu ke lenda ve na kutanga yawu.

16 Yave Mfumu, mu ke belama na ntadisi ya nge,

samu na kuzonzila mambu ya nge ya mbote mingi.

Mu ke bambuka moyo kaka na nge, kaka na ludedomo ya nge.

17 Nzambi, nge me longa munu kubanda buntwenya ya munu.

Tii na ntangu yayi, mu ke na kusamuna mambu ya nge ya ngitukulu.

18 Nzambi ya munu, kulosa munu ve ata na ntangu yayi,

mu me nuna mpe mu me kuma na bansuki ya mpembe,

samu ti mu zonzila ngolo ya nge na bantu ya mbandu yayi,

mu zonzila lulendo ya nge na bantu yina ke kwiza na manima.

19 Nzambi, ludedomo ya nge ke na kukuma tii na zulu,

samu ti nge me sala mambu ya nene.

Nzambi, nani me fwanana na nge?

20 Nge me lutisa beto na bampasi mpe bampasi ya kulutila.

Kasi nge me pesa dyaka beto luzingu.

Nge ke basisa munu na kati ya dibulu ya kondwa nsuka.

21 Pesa dyaka munu nkembo! Kindisa dyaka munu!

22 Munu mpe, mu ke kembila nge na nsambi,

samu na kukwikama ya nge, nge Nzambi ya munu.

Mu ke yimbidila nge na nsambi, nge Nzambi ya longo ya Isayeli!

23 Mu ke sala milolo ya nsayi,

ntangu mu ke yimbidila nge mikunga,

samu ti nge me vuukisa luzingu ya munu nyonso,

mu ke yimbidila nge.

24 Yinwa ya munu ke zonzila ntangu nyonso ludedomo ya nge,

bayina ke na kusosa kutalisa munu mpasi,

bawu me fuluka na nsoni,

bawu ke na kuyindula dyaka mbote ve.