Nzambi sala ti ntinu kusala banzengolo ya mbote,

sala ti mwana ya ntinu kuvwanda ya kudedama.

2 Yandi ke fundisa bantu ya nge na ludedomo nyonso,

yandi ke sala banzengolo ya mbote na yina me tadila bamputu.

3 Myongo ke nata kizunu samu na bantu,

myongo ya fyoti ke nata ludedomo.

4 Yandi ke sala lufundusu ya bamputu na mutindu ya kufwanakana,

yandi ke vuukisa bana ya muntu ya mpasi,

yandi ke sukisa muntu yina ke nyokolaka bantu.

5 Bantangu nyonso yina ntangu na ngonda ke vwanda,

bantu ke zitisa nge bambandu na bambandu.

6 Bika ti ntinu kuvwanda mutindu mvula yina ke na kunoka na matiti yina ba me zenga,

yandi vwanda mutindu maza yina ke na kubolisa ntoto.

7 Ntangu nyonso ya luzingu ya yandi, muntu ya kudedama ke vwanda na ntomosono,

kizunu ke fuluka ntangu nyonso yina ngonda ke lezima.

8 Yandi ke yala kubanda na mubu mosi tii na mubu ya nkaka,

yandi ke yala kubanda na nzadi ya Efalate tii na bandilu ya ntoto.

9 Bantu yina ke zingaka na yinsi ya kuyuma,

bawu ke fukama na mantwala ya yandi.

Bambeni ya yandi nyonso ke kudya ntoto.

10 Bantinu ya Talesise mpe ya bisanga ke nata bampaku ya bawu,

bantinu ya Saba na ya Seba ke natina yandi makabu ya bawu.

11 Bantinu nyonso ke fukama na mantwala ya yandi,

bayinsi nyonso ke sadila yandi.

12 Ya tsyelika yandi ke vuukisa muntu ya mpasi yina ke yawula na sika ya yandi,

yandi ke vuukisa mputu yina kele ve na muntu ya kusadisa yandi.

13 Yandi ke tala kyadi ya mputu mpe muntu ya mpasi.

Yandi ke vuukisa luzingu ya bantu ya mpasi.

14 Yandi ke kuula bawu na maboko ya bantu yina ke nyokolaka mpe bantu yina ke sala mambu ya ngolo,

samu ti luzingu ya bawu kele mfunu na meso ya yandi.

15 Bika ti ntinu kuvwanda na luzingu ya yinda.

Bika ti ba kupesa yandi wolo yina ke katukaka na Seba.

Bika ti bantu kusambila samu na yandi konso ntangu.

Bika ti ba kusakumuna yandi bilumbu nyonso.

16 Bika ti bambuma ya faline kuvwanda mingi na kati ya yinsi, na bansongi ya myongo.

Bika ti bambuma ya yawu kubasisa bifulu mutindu bayinti ya Libane.

Bika ti bantu kuzwa ntomosono na bambanza mutindu matiti ke menaka na ntoto.

17 Bika ti nkumbu ya yandi kuzingila bantangu nyonso.

Bika ti nkumbu ya yandi kuvwanda ya mankululu, mutindu ntangu.

Bika ti na nkumbu ya yandi, bantu kusakumuna bampangi bawu na bawu.

Bika ti bayinsi nyonso kutuba ti ntinu kuvwanda na buyenge.

18 Nkembo na Yave Nzambi, Nzambi ya Isayeli!

Ni yandi kaka ke salaka mambu ya ngitukulu!

19 Bika ti Nkumbu ya yandi ya nkembo kukemboswa bantangu nyonso!

Bika ti ntoto nyonso kufuluka na nkembo ya yandi. Ameni! Ameni!