Nzambi, samu na yinki nge me manga beto ya mankululu?

Samu na yinki nge ke na nkele ya kulutila na beto,

beto mameme ya nge yina nge ke dikilaka?

2 Bambukila mukangu ya bantu ya nge moyo!

Nge kuzwaka bawu katuka ntangu ya ntama,

nge kuulaka bawu,

bawu kele bantu ya kifumba ya nge,

bawu kele mvwilu ya nge!

Bambuka moyo na mongo ya Siyone,

kisika yina nge me tula Yinzo ya nge!

3 Kwiza tala mutindu yawu kele ya kumwangana ya mankululu,

mbeni me mwangisa bima nyonso na kati ya Yinzo ya nge ya longo.

4 Mitantu ya nge ke na kulooka na kisika yina beto vwandaka bwabana nge.

Bawu me tula kidimbu ya yinsi ya bawu kuna na kulakisa ti bawu me nunga.

5 Ba ke na kutala bawu mutindu mosi na muntu yina me simba soka,

samu na kuzenga bayinti yina kele na mfinda.

6 Mpe ntangu yayi, bawu me mwangisa bima nyonso yina ba fikulaka,

bawu me mwangisa yawu na basoka mpe na bikonkoto.

7 Bawu me tula tiya na kati ya Yinzo ya nge ya longo,

bawu me losa na ntoto mpe me safula Yinzo, kisika yina nge vwandisaka Nkumbu ya nge.

8 Bawu vwandaka tuba bawu na bawu:

«Beto manisa na kufwa bawu!»

Na yinsi nyonso bawu me yoka bisika,

yina bantu vwandaka kwenda sambila Nzambi.

9 Beto ke na kutala dyaka ve bidimbu ya beto,

mimbikudi mpe kele dyaka ve.

Muntu ve na kati ya beto me zaba tii wapi ntangu yawu ke vwandila mutindu yina.

10 Nzambi, tii wapi ntangu mutantu ke tatamana na kufinga nge?

Tii wapi ntangu mbeni ke tatamana na kusafula Nkumbu ya nge?

11 Nzambi, samu na yinki nge me benda diboko ya nge,

diboko ya nge ya lubakala?

Basisa yawu mpe manisa na kufwa bawu nyonso!

12 Nzambi kele ntinu ya munu, kubanda bantangu ya ntama,

yandi ke salaka ti beto kununga na yinsi.

13 Nzambi, ni nge pasulaka mubu na lulendo ya nge,

nge kosunaka bayintu ya bibulu ya nene ya nsisi ya mubu.

14 Ni nge kosunaka bayintu ya Levyatane*Levyatane kele kibulu ya nsisi ya nene ya mubu.,

nge me sala ti yawu kuvwanda madya ya bantu,

ya bantu yina ke zingaka na yinsi ya kuyuma.

15 Ni nge ke basisaka maza ya bayinto mpe ya bamwila.

Ni nge ke yumisaka banzadi yina ke kawukaka ve.

16 Kilumbu kele ya nge, mpimpa mpe kele ya nge,

ni nge yidikaka ngonda na ntangu.

17 Ni nge tulaka bandilu nyonso ya ntoto,

ni nge salaka ntangu ya tiya mpe ntangu ya madidi ya ngolo.

18 Yave, bambuka moyo ti mbeni me finga nge.

Bambuka moyo ti dikanda mosi ya bulawu me safula Nkumbu ya nge.

19 Kuyekula ve bantu ya nge yina nge ke zolaka na maboko ya bibulu ya mfinda.

Bantangu nyonso, kuzimbana ve bantu ya nge yina kele na mpasi.

20 Tala mbote ngwisani ya nge,

samu ti biswamunu ya yinsi me kuma bisika yina,

bantu yina ke salaka mambu ya ngolo ke na kwendaka bumbama.

21 Bika ti muntu yina ba ke na kunyokola kuvutuka ve na nsoni!

Bika ti muntu ya mpasi na mputu kukembila Nkumbu ya nge!

22 Nzambi telama, mpe nge kukinwanina!

Bambuka moyo na bifingu yina,

muntu yina kele ve na ndwenga ke na kufinga nge ntangu nyonso.

23 Nzambi kuzimbana ve kulooka ya mitantu ya nge,

kuzimbana ve makelele yina ke na kusala bayina ke na kunwanisa nge ntangu nyonso!