77
Na ntangu ya mpasi mu ke bambukaka moyo
1 Mukunga ya Asafe, mukunga yina ba twadisaka na mfumu ya miyimbidi. Mukunga ya Yedutune.
2 Na ndinga ya ngolo, mu ke na kulooka na sika ya Nzambi.
Na ndinga ya ngolo, mu ke na kulooka na Nzambi,
yandi me teka makutu na kuwa munu.
3 Na ntangu ya mpasi, mu ke sosaka Mfumu,
na mpimpa mu ke bikaka ve na kunanguna maboko na sika ya yandi,
mu ke mangaka mbombolo.
4 Mu me bambuka moyo na Nzambi mpe mu me yawula,
mu me yindula mpe mu me lemba.
Kupema
5 Nge me sala ti mu vwanda kaka ya kuvumbuka,
mu me kuma yeko-yeko mpe mu ke dyaka ve na dyambu ya kuzonza.
6 Mu ke na kuyindula samu na bantangu ya ntama,
mu ke na kuyindula samu na bamvula yina lutaka.
7 Mu ke na kubambuka moyo na mukunga ya munu,
na kati na mpimpa, mu ke na kuyindula,
mu ke na kukiyufula.
8 Mfumu ke losaka bantu ya yandi ya mankululu?
Yandi ke fwila dyaka ve bawu kyadi?
9 Kukwikama ya yandi ke zingilaka ve bantangu nyonso?
Mambu yina yandi ke zonzaka,
yawu ke zingilaka bambandu na bambandu.
10 Nzambi me zimbana na kufwila bantu kyadi?
Nkele ya yandi ke na kusala ti yandi kufwila dyaka bantu kyadi ve?
Kupema
11 Mu ke na kutuba mutindu yayi: «Mambu yina ke na kutalisa munu mpasi,
ni diboko ya lubakala ya Nzambi ya Kulutila Kuzangama,
ke dyaka ve mutindu yawu vwandaka.»
12 Mu ke zonzila dyaka mambu yina Yave salaka,
ya tsyelika, mu me bambuka moyo na mambu ya ngitukulu,
yina Yave salaka na ntangu ya ntama.
13 Mu ke zonzila dyaka nyonso yina yandi salaka,
mu ke yindula na yina me tadila mambu ya nge ya ngitukulu.
14 Nzambi, nge ke salaka na kati ya bulongo,
Nge kele Nzambi ya nene,
ya kele ve na nzambi yina me fwanana na nge.
15 Ni nge kele Nzambi yina ke salaka mambu ya ngitukulu!
Nge me lakisa lulendo ya nge na kati ya bantu.
16 Na lulendo ya nge, nge me kuula bantu ya nge,
bana ya Yakobi mpe bana ya Yosefi.
Kupema
17 Maza me tala nge, Nzambi, maza me tala nge,
yawu me toka mpe yisi ya maza ya nene me ningana.
18 Matuti me nokisa mvula ya nene,
mazulu ke na kuwakisa banzasi,
madyonga ya nge ke na kukwenda bisika nyonso.
19 Na kati ya makelele ya nzasi, na kati ya kimbongila,
balusyemo me pesa nsemo na yinza,
ntoto me ningana, yawu me tekita na boma.
20 Nge fungulaka nzila na kati ya mubu,
nge fungulaka nzila ya fyoti na kati ya maza ya nene,
bantu ke na kuzaba dyaka ve kisika yina nge lutilaka.
21 Nge twadisaka bantu ya nge mutindu nkonga ya mameme,
na lutwadusu ya Moyize mpe Aloni.