Bantu ya munu, beno kuwa Musiku ya munu!

Beno teka makutu na kuwa mambu ya yinwa ya munu!

2 Mu me fungula yinwa samu na kuzonza kingana,

mu ke na kusamuna bingana ya ntangu ya ntama.

3 Mambu yina beto kuwaka, mambu yina beto me zaba,

mambu yina bankooko ya beto zabisaka beto,

4 beto ke bumba yawu ve na bana ya bawu,

kasi beto ke zabisa na mbandu yina ke kwiza mikunga ya nzitusu ya Yave.

Beto ke zonzila lulendo ya yandi

mpe mambu ya ngitukulu yina yandi salaka.

5 Yandi me pesa ntumunu na Yakobi,

yandi me pesa Musiku na Isayeli.

Yandi pesaka ntumunu na bankooko ya beto na kuzabisa yawu na bana ya bawu,

6 samu ti bambandu yina ke kwiza, bawu kulongoka yawu,

mpe bana yina ke butuka na manima ya bawu,

bawu mpe, bawu kuzabisa yawu na bana ya bawu,

7 samu ti bawu kutula kivuvu ya bawu na Nzambi,

bawu kuzimbana ve mambu yina Nzambi me sadila bawu,

mpe ti bawu kusadila bantumunu ya yandi,

8 bawu ke vwanda ve mutindu vwandaka bankooko ya bawu,

bankooko ya bawu vwandaka tedimina Nzambi,

bawu vwandaka na yintu ngolo na Nzambi,

mbandu mosi ya bantu yina vwandaka ve ya kukangama na Nzambi,

bawu vwandaka ve ya kukwikama na Nzambi.

9 Bana ya Efalayime na minani ya bawu,

kimaka na kilumbu yina ya mvita.

10 Bawu bumbaka ve ngwisani ya Nzambi,

bawu mangaka na kulanda Musiku ya yandi.

11 Bawu zimbanaka mambu ya mbote yina Nzambi salaka.

Bawu zimbanaka mambu ya ngitukulu yina yandi lakisaka bawu.

12 Na meso ya bankooko ya bawu,

Nzambi salaka dyambu mosi ya ngitukulu.

Kuna na yinsi ya Ngipiti, na kizunga ya Soyane.

13 Yandi fungulaka nzila na kati ya mubu mpe yandi lutisaka bawu,

yandi telemisaka maza mutindu kibaka.

14 Na ntangu, ya yandi vwandaka twadisa bawu na dituti,

mpimpa nyonso, yandi vwandaka twadisa bawu na mulaka ya tiya.

15 Nzambi pasulaka matadi ya nene kuna na yinsi ya kuyuma,

mpe yandi pesaka bawu maza mingi ya kunwa,

mutindu maza ya yisi ya ntoto.

16 Na ditadi ya nene, yandi basisaka maza mutindu mwila,

yandi basisaka maza mutindu banzadi.

17 Kasi bawu vwandaka tatamana na kusala masumu na ntadisi ya Nzambi.

Bawu vwandaka tatamana na kusala yintu ngolo na ntadisi,

ya Nzambi ya Kulutila Kuzangama kuna na ntoto yina ata kima ke menaka ve.

18 Bawu sombolaka Nzambi na kati ya bantima ya bawu,

na kulombaka bima ya kudya mutindu bawu zola.

19 Bawu zonzaka mambu ya kulunga ve na ntadisi ya Nzambi, bawu tubaka:

«Nzambi lenda pesa beto madya kwaku na yinsi ya kuyuma?

20 Yandi bulaka ditadi ya nene mpe maza basikaka,

maza mingi mwanganaka,

yandi ke lenda na kupesa na bantu ya yandi mampa,

yandi ke lenda na kupesa na bantu ya yandi mbisi?»

21 Yave kuwaka mambu yina mpe yandi kumaka na nkele mingi.

Tiya mosi basikaka samu na kuyoka Yakobi.

Nkele ya Nzambi talanaka mutindu tiya samu na kuyoka Isayeli,

22 samu ti bawu tulaka ve kiminu ya bawu na Nzambi,

samu ti bawu kwikilaka ve ti Nzambi lenda vuukisa bawu.

23 Nzambi pesaka ntumunu na matuti,

yandi fungulaka myelo ya mazulu.

24 Yandi nokisilaka bawu madya yina ba ke bokilaka mane

samu ti bawu kudya, yandi pesaka bawu mampa ya mazulu.

25 Konso muntu kudyaka mampa ya bambazi,

Nzambi fidisaka bawu mampa,

samu ti bawu kudya yawu mpe ti bawu kuyukuta.

26 Kuna na zulu, yandi fulaka mupepe ya esete,

na lulendo ya yandi, yandi nataka mupepe ya sude.

27 Yandi nokisilaka bawu mbisi ya mingi mutindu fundu-fundu ya ntoto,

yandi pesaka bawu bandeke mingi mutindu munyenge ya mubu.

28 Nzambi vwandaka bwisila bawu yawu na kati-kati ya kivwandu ya bawu,

mpe pene-pene na bayinzo ya bawu.

29 Bawu kudyaka mbote mpe bawu nyonso yukutaka,

Nzambi pesaka bawu nyonso yina bawu vwandaka sosa.

30 Ata ti madya vwandaka ntete ya kufuluka na kati ya bayinwa ya bawu,

bawu talaka ti yawu me lunga ntete ve.

31 Nkele ya Nzambi bwidilaka bawu,

Nzambi kufwaka bayina vwandaka na ngolo mingi,

yandi kufwaka mpe bantwenya ya bantu ya Isayeli.

32 Ata nyonso yina, bawu salaka dyaka masumu,

bawu kwikilaka ve na mambu ya ngitukulu yina Nzambi salaka.

33 Kaka na mupepe, Nzambi sukisaka luzingu ya bawu,

yandi sukisaka bamvula ya luzingu ya bawu na kati ya boma.

34 Ntangu Nzambi vwandaka sosa kufwa bawu,

bawu vwandaka sosa Nzambi,

bawu vwandaka vutuka na Nzambi,

mpe bawu vwandaka sosa dyaka Nzambi.

35 Bawu vwandaka bambuka moyo ti Nzambi kele ditadi ya nene ya bawu,

mpe ti Nzambi ya Kulutila Kuzangama kele kikuudi ya bawu.

36 Kasi bawu vwandaka vuna yandi na mambu yina bawu vwandaka tuba,

bawu vwandaka zonza mambu ya luvunu.

37 Bantima ya bawu vwandaka ve ya kukangama mbote-mbote na Nzambi,

bawu vwandaka ve ya kukwikama na ngwisani ya yandi.

38 Kasi yandi yina ke fwilaka kyadi,

yandi vwandaka fuka masumu ya bawu,

yandi vwandaka kufwa bawu ve,

yandi vwandaka simba nkele ya yandi.

Yandi vwandaka lakisa ve nkele ya yandi nyonso.

39 Bawu vwandaka bambuka moyo ti bawu vwandaka kaka bantu,

mutindu mupepe yina me luta mpe ke vutuka dyaka ve.

40 Bambala mingi bawu vwandaka tumama ve na Nzambi kuna na yinsi ya kuyuma,

bambala mingi bawu vwandaka nyongisaka Nzambi kuna na ntoto yina ata kima ke menaka ve.

41 Bawu bandaka dyaka na kumeka Nzambi,

bawu bandaka dyaka na kunyongisa Nzambi ya Longo ya Isayeli.

42 Bawu bambukaka ve moyo na lulendo ya Nzambi,

bawu bambukaka ve moyo na kilumbu yina yandi kuulaka bawu na maboko ya mutantu.

43 Bawu bambukaka mpe moyo ve na bimangu yina Nzambi salaka na yinsi ya Ngipiti,

mpe mambu ya ngitukulu yina yandi salaka na kizunga ya Soyane.

44 Nzambi kitulaka bamwila ya nzadi ya Nile na menga,

mutindu mosi mpe bamwila ya fyoti,

bantu vwandaka lenda ve na kunwa maza yango.

45 Nzambi fidisaka bawu banzinzi yina vwandaka tatika mpe kufwa bawu.

Mpe bampangu yina vwandaka mwangisa bawu.

46 Yandi yekulaka madya ya bawu ya bilanga na makonko,

yandi yekulaka bambuma ya bisalu ya bawu na bambele-mbele,

47 Nzambi bebisaka bilanga ya bawu ya bayinti ya vinu na mvula ya matadi,

mpe basikomole ya bawu na mvula ya nene.

48 Yandi yekulaka bangombe na mameme ya bawu na mvula ya matadi.

Yandi kufwaka bibulu ya bawu na nzasi.

49 Nzambi dasukilaka bawu, yandi lakisaka bawu nkele ya yandi ya kulutila.

Yandi dasukaka, ya vwandaka mpasi mingi,

ya vwandaka nkonga ya bambazi ya mpasi.

50 Yandi bikaka ti nkele ya yandi kusala na kimpwanza,

yandi katulaka bawu ve na lufwa,

yandi yekulaka luzingu ya bawu na kiyoolo.

51 Yandi kufwaka bana nyonso ya ntete ya babakala kuna na yinsi ya Ngipiti,

bawu vwandaka ngolo ya ntete na kati ya makanda ya Same.

52 Yandi salaka ti bawu kubasika na yinsi ya Ngipiti mutindu mameme,

yandi vwandaka twadisa bawu mutindu nkonga ya bibulu na yinsi ya kuyuma.

53 Nzambi twadisaka bawu na lukengolo nyonso, bawu vwandaka tala boma ve,

mubu dyamisaka bambeni ya bawu.

54 Nzambi nataka bawu na ntoto ya yandi ya longo,

pene-pene ya mongo yina yandi kuzwaka na ngolo ya yandi.

55 Yandi bingisaka bantu ya bayinsi yina vwandaka zinga ntete kuna,

yandi kabulaka bantoto na bikunku, yandi pesaka bawu yawu mutindu mvwilu,

yandi salaka ti bantu ya bifumba ya Isayeli,

kuzinga na kati ya bayinzo ya bantu ya Kaana.

56 Kasi bantu ya Isayeli mekaka Nzambi, ya Kulutila Kuzangama.

Bawu balukilaka yandi, bawu landaka ve bansalulu ya misiku ya Nzambi.

57 Bawu pesaka Nzambi mukongo,

bawu zitisaka yandi ve, mutindu bankooko ya bawu,

bawu yina kele mutindu munani,

yina ba yidikaka mbote ve.

58 Bana ya Isayeli salaka ti Nzambi kuma na nkele,

samu ti bawu vwandaka kwenda sambila na bisika ya lusambulu yina vwandaka na zulu myongo.

Bawu vwandaka sombola Nzambi na kusambilaka biteki ya bawu.

59 Nzambi kuwaka mpe yandi kumaka na nkele ya kulutila,

na ngolo nyonso yandi losaka bana ya Isayeli,

60 Nzambi me bika Yinzo ya yandi ya Mbwabanu ya Silo,

Yinzo ya lele, kisika yina yandi vwandaka zinga na kati ya bantu.

61 Nzambi salaka ti Sanduku ya Ngwisani yina kele kidimbu ya ngolo ya yandi kukwenda,

yandi bikaka ti yawu kukwenda na nkembo ya yawu na sika ya bambeni.

62 Nzambi yekulaka bantu ya yandi na mbele ya mvita,

yandi dasukilaka mvwilu ya yandi.

63 Tiya kwizaka yoka bana ya bawu ya bantwenya,

bana ya bawu ya bakento vwandaka kuzwa dyaka ve mikunga ya nzitusu.

64 Ba kufwaka banganga-Nzambi ya bawu na mbele ya mvita,

mifwidi ya bawu dilaka ve.

65 Yave vumbukaka mutindu muntu ya ngolo yina vwandaka lala,

mutindu muntu ya ngolo yina kele na kati ya malafu ke na kulooka.

66 Nzambi bulaka mitantu ntangu bawu vwandaka kima,

yandi fwisaka bawu nsoni ya mankululu.

67 Nzambi mangaka dikanda ya Yosefi,

yandi soolaka ve kifumba ya Efalayime.

68 Yandi soolaka kifumba ya Yuda,

mongo ya Siyone yina yandi vwandaka zola.

69 Nzambi tungaka Yinzo ya yandi ya longo mutindu bisika ya kuzangama,

mutindu ntoto yina yandi yidikaka samu na bantangu nyonso.

70 Yandi soolaka Davidi kisyelo ya yandi,

Nzambi soolaka yandi ntangu yina Davidi vwandaka keba mameme.

71 Nzambi soolaka Davidi na manima ya mameme yina vwandaka pesa bana ya bawu mabene,

samu ti Davidi kuvwanda muvungi ya Yakobi, bantu ya yandi, mpe ya Isayeli mvwilu ya yandi.

72 Davidi vwandaka keba Isayeli na ntima ya kusungama,

Davidi vwandaka twadisa bawu na ndwenga nyonso.