Oo, Nzambi, bantu ya bayinsi ya nzenza me kwiza fuluka na yinsi yayi, yina kele mvwilu ya nge,

bawu me sumuna Yinzo ya nge ya longo,

bawu me sala ti Yelusalemi kukuma mutindu kikunku ya matadi.

2 Bambeni me yekula bamvumbi ya bisyelo ya nge,

samu ti yawu kukuma madya ya bandeke,

banzutu ya bayina kele ya kukwikama na nge me kuma madya ya bibulu ya mfinda.

3 Na balweka nyonso ya Yelusalemi,

bambeni me tangisa menga ya bawu mutindu maza,

ata muntu vwandaka kuna samu na kukunda bawu.

4 Bantu ya bayinsi yina kele pene-pene, bawu ke na kufinga beto,

ntangu nyonso, bawu ke na kuseka beto,

beto me kuma mutindu kisakununu ya bayina ke na kuzunga beto.

5 Yave, tii wapi ntangu nge ke vwanda kaka ya kudasuka?

Tii wapi ntangu kimbanda ya nge ke talana na beto mutindu tiya?

6 Sala ti nkele ya nge kubwidila bantu ya bayinsi yina me zaba nge ve,

na bayinsi ya bintinu yina ke bokilaka ve nkumbu ya nge!

7 Ya tsyelika, ba me botola Yakobi bima ya yandi nyonso,

ba me mwangisa ntoto ya yandi.

8 Nzambi, kubambuka dyaka ve moyo na yimbi yina beto salaka,

na nswalu nyonso, fwila beto kyadi, samu ti beto me lemba mingi!

9 Kwiza sadisa beto, nge Nzambi yina ke vuukisaka beto,

samu na nkembo ya nkumbu ya nge!

Kuula beto mpe fuka masumu ya beto, samu na Nkumbu ya nge!

10 Kubika ve ti bantu ya bayinsi ya nzenza kutuba ti:

«Wapi sika kele Nzambi ya bawu?»

Bika ti yawu kuzabana na bayinsi nyonso mpe na meso ya beto.

Ya me lunga ti nge futisa yimbi ya bantu yina tangisaka menga ya bisyelo ya nge!

11 Sala ti kuyawula ya bankole kukuma ti na ntadisi ya nge!

Na lulendo ya nge ya kulutila, vuukisa bantu ya nge yina kele na mpasi ya lufwa!

12 Futisa bambeni ya beto yimbi yina bawu me sala nge,

Yave, vutudila bawu yawu bambala nsambwadi.

13 Na yina me tadila beto bantu ya nge, beto mameme ya nge, yina nge ke dikilaka

beto ke kembila nge bantangu nyonso,

bambandu na bambandu, beto ke yimbila nge mikunga ya nzitusu.