80
Muvungi ya Isayeli, kuwa
1 Mukunga ya Asafe, mukunga yina ba twadisaka na mfumu ya miyimbidi, ba yimbilaka yawu na muningu ya nsambi.
2 Nge Muvungi ya Isayeli, kuwa mbote,
nge yina ke na kutwadisa Yosefi mutindu nkonga ya bibulu,
nge yina kele ya kuvwanda na zulu ya bakeluba,
talana na kati ya nkembo ya nge!
3 Na mantwala ya Efalayime, ya Bezame, mpe ya Manase,
lakisa ngolo ya nge, mpe kwiza vuukisa beto!
4 Nzambi, vutula beto na sika ya nge,
lakisa beto bumbote ya nge, samu ti beto vuuka!
5 Yave Nzambi ya Binwani, tii wapi ntangu nge ke vwanda na nkele
na yina me tadila lusambulu ya bantu ya nge?
6 Nge pesaka bawu mansangasa mutindu madya,
nge salaka ti bawu kunwa mansangasa mutindu maza.
7 Nge me sala ti beto kuma bantu ya mindondo samu na bantu yina kele pene-pene na beto.
Bambeni ya beto ke na kuseka beto.
8 Nzambi ya Binwani, vutula beto na sika ya nge,
lakisa beto bumbote ya nge, samu ti beto vuuka!
9 Kuna na yinsi ya Ngipiti, nge katulaka beto mutindu yinti ya vinu.
Nge bingisaka bantu ya bayinsi ya nzenza samu na kutula beto kuna.
10 Nge yidikilaka beto kisika ya mbote,
myanzi ya beto kotaka mingi na yisi ya ntoto,
mpe yawu fulukaka na yinsi.
11 Mpewo ya beto vwandaka fuka myongo,
mpe bintala ya beto vwandaka mutindu bayinti ya sedele ya Nzambi.
12 Bintala ya yinti ya vinu yango vwandaka kwenda tii na mubu ya Meditelane,
mpe mitwikila ya yawu vwandaka kwenda tii na nzadi ya Efalate.
13 Nzambi, samu na yinki nge me sala mabulu na bikaka ya yawu?
Bantu nyonso yina ke na kulutaka kuna ke na kubuka bambuma ya yawu.
14 Ngulu ya mfinda me mwangisa yawu,
bibulu ya mfinda me kitula yawu madya ya bawu.
15 Nzambi ya Binwani, mulemvo ya nge!
Vutuka na kati-kati ya beto, katuka kuna na mazulu, losa meso mpe tala!
Tala yinti ya vinu yayi kyadi!
16 Keba kintala yina nge me kunda na diboko ya nge ya lubakala,
keba mwana yina nge mosi, me sala ti yandi kuvwanda na ngolo samu na nge.
17 Ba me nyengisa yinti ya nge ya vinu,
ba me zenga yawu, ntangu nge me duma, bawu me zimbana.
18 Bika ti diboko ya nge kuvwanda na muntu yina kele na lweka ya nge ya lubakala,
muntu yina nge mosi me sala ti, yandi kuvwanda na ngolo samu na nge.
19 Beto ke bika dyaka nge ve, sala ti beto kuzinga dyaka,
mpe beto ke bokila Nkumbu ya nge.
20 Yave, Nzambi ya Binwani, vutula beto na sika ya nge!
Lakisa beto bumbote ya nge, samu ti beto vuuka!