81
Kana bantu ya munu wilaka munu
1 Mukunga ya Asafe, mukunga yina ba twadisaka na mfumu ya miyimbidi, ba yimbilaka yawu na muningu ya nsambi ya Ngate.
2 Beno sala milolo ya nsayi samu na Nzambi, yandi kele ngolo ya beto.
Beno looka na kyese samu na Nzambi ya Yakobi!
3 Beno yimbila mukunga,
beno wakisa muningu ya ngoma ya fyoti,
beno wakisa muningu ya nsambi mpe ya dituutu!
4 Beno wakisa muningu ya mpungi na bilumbu ya ntete ya ngonda,
na bilumbu yina ngonda ke vwandaka ya muvimba,
na kilumbu ya mukembo ya beto!
5 Yawu kele nsalulu ya misiku samu na bantu ya Isayeli.
Yawu kele mambu ya kusadila yina Nzambi ya Yakobi me tumisa.
6 Yawu kele Musiku yandi kwikaka samu na Yosefi,
ntangu yandi basikaka samu na kunwanisa yinsi ya Ngipiti.
Mu kuwaka ndinga yina mu vwandaka zaba ve, yawu tubaka:
7 Mu katulaka mufuna yina vwandaka na digembo ya nge,
nge pemisaka maboko ya nge na bisalu na ngolo.
8 Na kati ya mpasi, nge lookaka na sika ya munu,
mpe mu kuulaka nge, na kati ya makelele ya nsisi,
mu kuwaka lusambulu ya nge, mu mekaka nge pene-pene ya maza ya Meliba.
Kupema
9 Bantu ya munu, beno kuwa munu mpe mu ke lwengisa beno,
Isayeli, kana nge kuwaka kwandi munu!
10 Ba kutala ve nzambi ya nkaka na sika ya nge!
Kufukimina ve banzambi ya nzenza!
11 Mu kele Yave, Nzambi ya nge,
Nzambi yina basisaka nge na yinsi ya Ngipiti,
fungula mingi yinwa ya nge mpe mu ke fulusa yawu.
12 Kasi bantu ya munu wilaka munu ve,
bantu ya Isayeli zolaka munu ve.
13 Mpe mu me yekula bawu samu ti
bawu kusala mambu yina bawu zola mingi,
bawu me landa mabanza ya bawu mosi.
14 Aa! Kana bantu ya munu wilaka kwandi munu!
Aa! Kana bana ya Isayeli landaka malongi ya munu!
15 Kaka na mbala mosi, mu zolaka nunga bambeni ya bawu,
mu zolaka bula mitantu ya bawu na diboko ya munu.
16 Bantu yina ke yinaka Yave, bawu ke leba yandi,
Isayeli ke zinga na kizunu bantangu nyonso.
17 Nzambi ke pesa bana ya Isayeli bambuma ya faline ya mbote,
mu ke pesa bawu mafuta ya nyosi ya mingi.