84
Kyese na bayina ke zingaka na Yinzo ya Yave
1 Mukunga ya bana ya Kole, mukunga yina ba twadisaka na mfumu ya miyimbidi, ba yimbilaka yawu na muningu ya nsambi.
2 Yave Nzambi ya Binwani,
mu zola mingi Yinzo ya nge!
3 Mu me lemba mpe mu ke na nsatu mingi ya kukota nswalu na bangaanda ya kati ya Yinzo ya Yave,
ntima ya munu mpe nzutu ya munu ke na kulooka na Nzambi ya moyo.
4 Nswini ke na yinzo ya yandi,
dikwangu ke na dizanza ya yandi kisika yina yandi ke tulaka bana ya yandi.
Mu ke sosaka nge pene-pene ya biyokolo ya nge ya minkayulu, Yave Nzambi ya Binwani,
nge kele ntinu ya munu mpe Nzambi ya munu!
5 Kyese mingi na bantu yina ke zingaka na Yinzo ya nge,
bawu lenda kembila dyaka nge!
Kupema
6 Kyese mingi na bantu yina ke kuzwaka ngolo ya bawu na sika ya nge,
mabanza ya bantima ya bawu kele mutindu,
banzila yina kele ya kuyilama.
7 Ntangu bawu ke tambulaka na kati ya mudimba ya Bidilu,
Nzambi ke sobaka yawu na bisika yina kele na maza,
mpe mvula ya ntete ke fulusaka yawu na lusakumunu.
8 Ngolo ya bawu ke na kubwelama ntangu bawu ke tambulaka,
bawu ke talanaka na ntadisi ya Nzambi, kuna na Siyone.
9 Yave Nzambi ya Binwani, kuwa lusambulu ya munu.
Nzambi ya Yakobi, kuwa munu!
Kupema
10 Nge kele kinwanunu ya beto yina ke kebaka nzutu,
Nzambi tala! Tala kizizi ya muntu yina nge byekaka na kudukula yandi mafuta!
11 Kulutisa kilumbu mosi na kati ya ngaanda ya lupangu ya Yinzo ya Nzambi,
yawu me lutila funda ya bilumbu na bisika ya nkaka.
Mu me soola na kuvwanda na mwelo ya Yinzo ya Nzambi ya munu,
yawu me lutila na kuvwanda na bayinzo ya lele ya bantu ya yimbi.
12 Ya tsyelika, Yave kele ntangu mpe kinwanunu yina ke kebaka nzutu.
Yave ke fwilaka kyadi mpe yandi ke pesaka nkembo,
yandi ke yiminaka kima mosi ve
na bantu yina ke tambulaka na kusungama nyonso.
13 Yave, Nzambi ya Binwani,
kyese mingi na muntu yina me tula kivuvu ya yandi na nge!