85
Lusambulu samu na kizunu
1 Mukunga ya bana ya Kole, mukunga yina ba twadisaka na mfumu ya miyimbidi.
2 Yave, nge lakisaka bumbote ya nge na yinsi ya nge,
nge vutulaka bana ya Yakobi mutindu bawu vwandaka ntete.
3 Nge lemvokilaka yimbi ya bantu ya nge,
nge fukaka masumu nyonso ya bawu.
Kupema
4 Nge me kulula nkele ya nge nyonso,
nge me bika nkele ya nge ya kulutila.
5 Vutula beto na ntoto ya beto!
Nge Nzambi yina ke vuukisaka beto!
Bika nkele ya nge, yina nge kele na yawu na beto!
6 Nge ke tatamana na kuvwanda na nkele na beto?
Nge ke tatamana na kubumba nkele ya nge bambandu na bambandu?
7 Ni nge ke vutula beto na luzingu,
samu ti bantu ya nge kuyangalala na nge.
8 Yave, lakisa beto kukwikama ya nge,
mpe pesa beto mpulusu ya nge.
9 Mu ke kuwa mambu yina Yave Nzambi me tuba,
samu ti yandi ke zonzaka samu na kizunu ya bantu ya yandi,
mpe samu na bantu yina kele ya kukwikama na yandi,
kasi bawu vutukaka na kusadila mambu ya buzoba.
10 Ya tsyelika mpulusu ya yandi kele pene-pene ya bantu,
yina ke zitisaka yandi,
samu ti nkembo ya Nzambi kuzingila na yinsi ya beto.
11 Kukwikama mpe butsyelika ke na kubwabana,
ludedomo mpe kizunu ke na kubumbasana.
12 Butsyelika ke na kubasika na ntoto,
ludedomo ke na kukwiza katuka na mazulu.
13 Yave yandi mosi ke pesa beto buyenge,
ntoto ya beto ke pesa madya ya yawu.
14 Ludedomo ke tambula na mantwala ya yandi,
balutambi ya yandi ke talana na nzila.