Ntoto nyonso, beno yimbidila Yave!

2 Beno yimbidila Yave, beno kembila Nkumbu ya yandi.

Beno samuna konso kilumbu mambu ya yandi ya mbote yina ke vuukisaka!

3 Beno mwangisa nsangu ya nkembo ya yandi na kati ya bayinsi.

Beno zonzila mambu ya yandi ya ngitukulu na bantu nyonso!

4 Ya tsyelika, Yave kele Nzambi ya nene,

yandi me bonga na masiika!

Yandi kele Nzambi ya nsisi kulutila banzambi nyonso.

5 Ya tsyelika, banzambi nyonso ya bayinsi ya nkaka kele banzambi ya luvunu,

kasi ni Yave yidikaka mazulu.

6 Yandi ke na kulezima mpe yandi kele kitoko,

lulendo mpe nkembo ya yandi kele na kati ya Yinzo ya yandi ya longo.

7 Beno makanda ya bantu,

beno pesa nzitusu na Yave!

Beno pesa na Yave nkembo mpe lulendo!

8 Beno pesa na Yave nkembo ya Nkumbu ya yandi!

Beno nata makabu, beno kota na kati ya ngaanda ya Yinzo ya yandi!

9 Beno yinama na ntadisi ya Yave, ntangu bulongo ya yandi ke na kulezima,

beno tekita na ntadisi ya yandi, beno bantu nyonso ya ntoto.

10 Beno tuba na bayinsi: «Ni Yave kele ntinu.

Yinza kele ya kusikama, yawu lenda kubwa ve,

Yave ke fundisaka bantu na kusungama nyonso.»

11 Bika ti mazulu kuyangalala, bika ntoto kuvwanda na nsayi ya kulutila!

Bika ti mubu na nyonso yina kele na yawu kusala makelele.

12 Bika ti bilanga na nyonso yina kele na yawu kuvwanda na nsayi,

bika ti bayinti nyonso ya mfinda kusala milolo ya nsayi,

13 na ntadisi ya Yave,

samu ti yandi ke na kwiza!

Ya tsyelika, yandi ke na kwiza samu na kufundisa yinza,

yandi ke fundisa yinza na ludedomo nyonso,

yandi ke fundisa bantu na kukwikama ya yandi.