1 Ni Yave kele ntinu!

Bika ti ntoto nyonso kuvwanda na nsayi ya mingi,

bika ti bantu nyonso yina ke zingaka na bisanga kuyangalala!

2 Dituti mpe kitombe ya ngolo me zunga yandi,

ludedomo mpe kusungama kele lufulu ya kiti ya yandi ya kintinu.

3 Tiya mosi ke na kutekila na ntadisi ya yandi,

yawu ke na kuyoka mitantu yina kele na balweka nyonso.

4 Balusyemo ya yandi ke na kupesa nsemo na yinza,

ntoto ke na kutala yawu mpe yawu ke na kutekita.

5 Myongo ke na kusulumuka mutindu mafuta ya nyosi na ntadisi ya Yave,

na ntadisi ya Yave, Nzambi ya ntoto nyonso.

6 Mazulu ke na kuzonzila ludedomo ya yandi,

bantu nyonso ke na kutala nkembo ya yandi.

7 Bawu ke tala nsoni,

bantu nyonso yina ke sambilaka biteki,

bantu nyonso yina ke salaka lunangu samu na banzambi ya bawu ya luvunu,

banzambi nyonso ke yinama na ntadisi ya Yave.

8 Siyone ke kuwa yawu mpe yandi ke yangalala,

bandumba ya Yuda ke vwanda na nsayi mingi,

samu na banzengolo ya Yave!

9 Samu ti nge Yave, nge kele Nzambi ya Kulutila Kuzangama na ntoto nyonso,

ya tsyelika, nge kele Nzambi yina me lutila kuzangama na zulu ya banzambi nyonso.

10 Beno bayina ke zolaka Yave, beno kuyina yimbi!

Yandi ke bumbaka luzingu ya bantu yina kele ya kukwikama na yandi,

yandi ke kuulaka bawu na maboko ya bantu ya yimbi.

11 Bumbote ya Yave ke na kulezima muntindu nsemo samu na muntu ya kudedama,

nsayi kele samu na muntu yina kele na ntima ya kusungama.

12 Beno bantu ya kudedama, beno yangalala na Yave,

beno kembila yandi na kubokilaka Nkumbu ya yandi ya longo.