Beno yimbidila Yave mukunga ya malu-malu,

samu ti yandi ke salaka mambu ya ngitukulu,

diboko ya yandi ya lubakala mpe diboko ya yandi ya longo me pesa yandi lunungu.

2 Yave me sala ti bantu kuzaba ti yandi ke vuukisaka,

yandi me lakisa ludedomo ya yandi na meso ya bantu ya bayinsi.

3 Yandi me bambuka moyo na bumbote

mpe na kukwikama ya yandi, samu na bantu ya Isayeli,

bantu yina kele na bandilu nyonso ya ntoto,

me tala mpulusu ya Nzambi ya beto.

4 Beno sala milolo ya nsayi, beno bantu nyonso ya ntoto!

Beno looka na nsayi nyonso, beno yimbila!

5 Beno sika nsambi samu na Yave,

beno wakisa muningu ya nsambi.

6 Beno sika bakulumenta mpe beno wakisa muningu ya mpungi,

beno sala milolo ya nsayi na ntadisi ya Yave ntinu!

7 Bika ti mubu na nyonso yina kele na yawu kusala makelele,

mutindu mosi mpe yinza na bantu nyonso yina ke zingaka na yinza!

8 Bika ti banzadi kubula maboko,

kintwadi na banzadi, myongo kusala milolo ya nsayi,

9 na ntadisi ya Yave,

samu ti yandi ke na kwiza fundisa yinza!

Yandi ke fundisa yinza na ludedomo,

yandi ke fundisa bantu na kusungama nyonso.