mpe ke na kutalisa mpasi ya yandi na Yave.

2 Yave kuwa lusambulu ya munu,

mpe kulooka yina mu ke na kulooka,

samu ti nge sadisa munu,

yawu kukuma na sika ya nge.

3 Kupesa munu ve mukongo,

na ntangu yina mu ke na mpasi!

Tamba dikutu ya nge,

ntangu mu ke na kulooka na sika ya nge!

Pesa munu mvutu na nswalu nyonso!

4 Bilumbu ya luzingu ya munu ke na kuluta mutindu mulinga,

mikwa ya munu ke na kuya tiya mutindu makala ya tiya.

5 Ntima ya munu ke na mpasi,

yawu me yuma mutindu matiti,

mu ke na kuzimbana ata madya ya kudya.

6 Mu ke na kuyawula mingi,

ni yawu yina mpusu ya nzutu ya munu,

me vukana na mikwa ya munu.

7 Mu me kuma mutindu,

ndeke yina ke vwandaka na yinsi ya kuyuma,

mu me kuma mutindu dikuti ya bayinzo ya kubeba.

8 Mu ke na kulala ve, mu me kuma mutindu ndeke,

yina kele kaka yandi mosi na zulu ya muludi.

9 Bilumbu nyonso,

bambeni ya munu ke na kukwamisa munu.

Bawu ke na kutala munu nkele,

bawu ke na kusiinga bantu na nkumbu ya munu.

10 Bombi me kuma madya ya munu.

Nyonso yina mu ke na kunwa, yawu ke na kuvukana na mansangasa ya munu.

11 Samu na nkele ya nge ya kulutila mpe samu na nkele ya nge,

nge me nanguna munu mpe nge me losa munu ntama.

12 Bilumbu ya luzingu ya munu,

ke na kuluta mutindu mpewo ya nkokila,

mu me yuma mutindu matiti.

13 Kasi nge Yave, nge ke yalaka bantangu nyonso,

bambandu na bambandu,

bantu ke bambukaka moyo na Nkumbu ya nge.

14 Nge ke telama mpe nge ke sala,

ntangu yayi, fwila Siyone kyadi,

ya tsyelika, ntangu me lunga.

15 Beto bisadi ya nge, beto ke zolaka matadi ya yawu.

Beto ke talaka kyadi ya fundu-fundu ya yawu.

16 Na yina, bantu ya bayinsi ya nkaka ke zitisa Nkumbu ya Yave,

bantinu ya ntoto nyonso ke zitisa nkembo ya nge.

17 Ya tsyelika, Yave ke tunga dyaka Siyone,

yandi ke talana na kati ya nkembo ya yandi.

18 Yandi ke kuwaka lusambulu ya bantu yina ke na mpasi,

yandi ke vwezaka ve balusambulu ya bawu.

19 Bika ti ba sonika yawu samu na bambandu yina ke kwiza,

samu ti bantu yina ke butuka, bawu kukembila Yave.

20 Kuna na Yinzo ya yandi ya longo,

Yave me losa ntalulu na yisi samu na kutala,

katuka na zulu, yandi ke na kutala ntoto,

21 samu na kuwa kuyawula ya bankole,

samu na kukuula bayina kele na kati ya mpasi ya lufwa,

22 samu ti ba samuna Nkumbu ya Yave na Siyone,

mpe ti ba yimbila yandi mikunga ya nzitusu na Yelusalemi,

23 ntangu bantu nyonso mpe bayinsi ya bintinu nyonso ke vukana kisika mosi,

samu na kusadila Yave.

24 Na kati-kati ya nzila,

yandi me sukisa ngolo ya munu,

yandi me kulula bilumbu ya luzingu ya munu.

25 Na yina, mu tubaka:

«Nzambi ya munu, kubaka ve mwela ya munu ntete ntangu ya munu kulunga,

nge yina ke zingilaka bambandu na bambandu!»

26 Bantangu mingi me luta katuka ntangu nge yidikaka ntoto,

mpe ni nge yidikaka mazulu na maboko ya nge.

27 Bawu, ba ke zimbana kasi nge, nge ke zingila,

bawu ke beba mutindu kinkuti,

nge ke soba bawu mutindu kinkuti, bawu ke zimbana.

28 Kasi nge Nzambi, nge ke sobaka ve

mpe luzingu ya nge kele ve na nsuka.

29 Bana ya bisyelo ya nge ke kuzwa yinzo,

batekolo ya bawu ke zingila na ntadisi ya nge.