Nzambi yina mu ke yimbidilaka mikunga ya nzitusu kuvwanda ve swii!

2 Bantu ke na kufungula bayinwa, samu na kuzonza mambu ya yimbi mpe ya luvunu na yina me tadila munu,

bawu ke na kuvunina munu mambu.

3 Bawu me yina munu na nyonso yina bawu ke na kutuba,

bawu ke na kunwanisa munu kondwa dyambu.

4 Mu ke zolaka bawu, kasi bawu, bawu ke na kutelemina munu,

kasi munu, mu me kangama kaka na lusambulu.

5 Bawu ke na kuvutula munu yimbi samu na mbote yina mu me sadila bawu,

bawu ke na kuyina munu, samu na luzolo yina mu me lakisa bawu.

6 Bawu ke na kutuba:

«Beto yekula yandi na maboko ya muntu ya yimbi,

mpe muntu yina ke funda yandi kuvwanda na lweka ya yandi ya lubakala.

7 Ntangu ba ke fundisa yandi, ba tuba ti yandi me sala yimbi,

bika ti lusambulu ya yandi kutalana mutindu disumu.

8 Bilumbu ya luzingu ya yandi kuvwanda ya mingi ve,

muntu ya nkaka kusala kisalu ya yandi!

9 Bika ti bana ya yandi kukuma bansaana,

kento ya yandi kukuma mufwidi!

10 Bika ti bana ya yandi banda na kwendaka dyengila bisika nyonso,

bawu banda na kwendaka lomba kima ya kudya!

Bika ti bawu banda na kwendaka sosa madya ntama na yinzo ya bawu ya kumwangana!

11 Bika ti kidefisi yina, me defisa yandi mbongo, baka bima ya yandi nyonso,

bika ti banzenza kubaka na ngolo bima nyonso yina yandi kuzwaka.

12 Ata muntu kulakisa yandi bumbote,

muntu ve ke tala bansaana ya yandi kyadi!

13 Bika ti bana ya yandi manisa na kufwa,

bika ti nkumbu ya bawu kuzimbana na bambandu yina ke kwiza!

14 Bika ti ba bambula Yave moyo na yimbi yina bankooko ya yandi salaka,

bika ti ba katula ve disumu ya mama ya yandi!

15 Bika ti yimbi ya bawu kuvwanda ntangu nyonso na mantwala ya Yave,

bika ti nkumbu ya bantu ya mutindu yina kuzimbana awa na ntoto.

16 Ya tsyelika, muntu yina bambukaka ve moyo na kusala mambu ya mbote,

yandi vwandaka kwamisa bantu ya mpasi mpe bamputu,

tii na kufwa bantu yina ke na mpasi na bantima ya bawu.

17 Yandi zolaka nsiingulu: Bika ti yawu kubwidila yandi,

yandi vwandaka zola ve lusakumunu: Bika ti yawu kuvwanda ntama na yandi.

18 Bika ti yandi kulwata nsiingulu mutindu kinkuti,

bika ti yawu kukota na kati ya yandi mutindu maza,

bika ti yawu kukota na kati ya mikwa ya yandi mutindu mafuta.

19 Bika ti nsiingulu kuvwanda mutindu kinkuti yina yandi me fukila,

bika ti yawu kuvwanda kaka ya kukangama na yandi mutindu singa ya luketo!»

20 Ni yina ke vwanda musendo ya mitantu ya munu,

mpe ya bayina ke zonzaka yimbi na nkumbu ya munu.

21 Kasi nge Yave, mfumu ya munu,

sadila munu bumbote samu na Nkumbu ya nge,

samu ti kukwikama ya nge kele mbote, kuula munu!

22 Mu kele mputu mpe muntu ya mpasi,

ntima ya munu kele ya kulwala na kati ya munu.

23 Mu ke na kukwenda mutindu mpewo ya nkokila,

ba ke na kubingisa munu mutindu dikonko.

24 Makoto ya munu ke na kulosa munu samu ti mu me mina-nsoki,

nzutu ya munu me lemba mpe mu me konda.

25 Mu kumaka muntu ya nsoni,

bawu ke na kutala munu mpe bawu ke na kuningisa bayintu ya bawu.

26 Kwiza sadisa munu, Yave, Nzambi ya munu.

Vuukisa munu samu ti nge kele Nzambi ya luzolo!

27 Bika ti ba zaba ti ni nge,

bawu kuzaba ti ni diboko ya nge Yave me sala yawu.

28 Bawu ke na kuvweza kasi nge,

nge ke na kusakumuna.

Kana bawu kutelama, bawu ke tala nsoni,

kasi munu kisyelo ya nge mu ke yangalala.

29 Bika ti mitantu ya munu kufuluka na nsoni,

bika ti nsoni kufuka bawu mutindu kiyunga!

30 Mu ke kembila Yave na ndinga ya ngolo,

mu ke yimbidila yandi mikunga ya nzitusu na kati-kati ya bantu mingi.

31 Ya tsyelika, yandi ke telamaka na lweka ya lubakala ya mputu,

samu na kuvuukisa yandi na maboko ya bantu yina ke na kufundisa yandi.