2 Nzambi ya munu, ntima ya munu kele ya kusyama!

Mu ke yimbidila, mu ke yimbidila nge mikunga na bisikulu ya munu, ni yawu kele nkembo ya munu!

3 Beno vumbuka, beno bansambi ya munu,

mu ke vumbula nsemo ya suka-suka.

4 Yave, mu ke kembila nge na kati ya makanda ya bantu,

mu ke yimbidila nge na kati ya bayinsi,

5 samu ti, kukwikama ya nge me luta mazulu,

mpe butsyelika ya nge ke kumaka tii na matuti.

6 Nzambi telama na zulu ya mazulu,

bika ti nkembo ya nge kuvwanda na zulu ya ntoto nyonso,

7 Vuukisa beto na diboko ya nge ya lubakala, pesa munu mvutu,

samu na kukuula bayina nge ke zolaka.

8 Na kati ya Yinzo ya yandi ya longo, Nzambi tubaka mutindu yayi:

«Mu ke nunga, mu ke kabula mbanza Siseme,

mu ke teza mudimba ya Sukote.

9 Ngalaade kele ya munu, Manase kele ya munu.

Efalayime kele yimpu yina ke kebaka yintu ya munu, Yuda kele mukawa ya munu ya lutumu.

10 Mowabe kele ndonga ya nene yina mu ke yobidilaka.

Mu ke losa dipapa ya munu na yinsi ya Edome.

Yinsi ya ba-Filiseti, sala milolo ya mvita samu na kunwanisa munu yinsi ya ba-Filiseti.»

11 Nani ke nata munu na mbanza ya kutungama na bibaka ya lukengolo?

Nani ke nata munu tii na Edome?

12 Nzambi, ni nge ve mangaka beto?

Nzambi, ni nge ve vwandaka kwenda dyaka ve na binwani ya beto na mvita?

13 Kwiza sadisa beto, kuula beto na maboko ya mutantu!

Lusalusu ya bantu kele kaka mpamba.

14 Kintwadi na Nzambi, beto ke sala mambu ya ngitukulu,

ni yandi ke nika bambeni ya beto.